جموں, 21 جولائی (ہ س)منشیات کے خلاف جاری مہم کے تحت ضلع انتظامیہ کٹھوعہ اور پولیس نے مشترکہ کارروائی کرتے ہوئے مرہین تحصیل کے سپرل پین علاقے میں مبینہ طور پر منشیات فروشی میں ملوث افراد کے دو مکانات اور ایک مویشی خانہ منہدم کر دیا۔

حکام کے مطابق یہ جائیدادیں سرکاری اراضی پر قبضہ کرکے غیر قانونی طور پر تعمیر کی گئی تھیں اور ان کی مجموعی مالیت تقریباً ساڑھے تین کروڑ روپے ہے۔ کارروائی گلزار عرف ڈاؤ اور فرمان علی سکنہ سپرل پین، کی جائیدادوں کے خلاف کی گئی۔

حکام نے بتایا کہ دونوں افراد کے خلاف منشیات کی اسمگلنگ اور دیگر جرائم سے متعلق متعدد مقدمات درج ہیں۔ انتظامیہ نے کہا کہ منشیات کے کاروبار میں ملوث افراد کے خلاف سخت کارروائی جاری رہے گی اور کسی کو بھی جرائم سے حاصل آمدنی سے فائدہ اٹھانے کی اجازت نہیں دی جائے گی۔

ہندوستھان سماچار

---------------

ہندوستان سماچار / محمد اصغر