نئی دہلی، 21 جولائی(ہ س)۔ عام آدمی پارٹی (آپ) کے قومی کنوینر اور دہلی کے سابق وزیر اعلیٰ اروند کیجریوال نے منگل کے روز رام منوہر لوہیا (آر ایم ایل) اسپتال پہنچ کر جنتر منتر مظاہرے کے دوران زخمی ہونے والے طلبہ اور پولیس اہلکاروں کی عیادت کی۔

اسپتال کے باہر صحافیوں سے گفتگو کرتے ہوئے کیجریوال نے کہا کہ پیر کے روز طلبہ کے خلاف مبینہ پولیس کارروائی کے دوران کئی طلبہ اور پولیس اہلکار زخمی ہوئے تھے۔ انہوں نے بتایا کہ زخمیوں میں سے بیشتر کو اسپتال سے فارغ کر دیا گیا ہے، جبکہ ایک طالبہ اب بھی تشویشناک حالت میں زیرِ علاج ہے۔

کیجریوال نے کہا کہ پولیس نے انہیں بتایا ہے کہ ایک طالبہ کے علاوہ تمام زخمیوں کو ڈسچارج کر دیا گیا ہے۔ انہوں نے اس طالبہ کی جلد صحت یابی کے لیے نیک تمناؤں کا اظہار کیا۔

انہوں نے سوشل میڈیا پر گردش کرنے والی خبروں کا حوالہ دیتے ہوئے کہا کہ تقریباً 110 افراد کے اسپتال میں داخل ہونے کی اطلاعات سامنے آئی تھیں، لیکن اس وقت اسپتال میں صرف ایک طالبہ زیرِ علاج ہے، جبکہ باقی تمام افراد کو چھٹی دے دی گئی ہے۔

اروند کیجریوال نے الزام عائد کیا کہ پولیس مرکزی حکومت کی ہدایات پر آمرانہ انداز میں لوگوں کو گرفتار کر رہی ہے، ان کے خلاف جھوٹے مقدمات درج کیے جا رہے ہیں اور بغیر ایف آئی آر کے حراست میں لیا جا رہا ہے۔ ان کا کہنا تھا کہ کئی والدین اپنے بچوں کے بارے میں معلومات نہ ملنے کے باعث شدید پریشان ہیں۔انہوں نے مزید بتایا کہ آر ایم ایل اسپتال کے دورے کے بعد وہ پارلیمنٹ اسٹریٹ پولیس اسٹیشن بھی جائیں گے۔

اس موقع پر عام آدمی پارٹی کے دہلی ریاستی صدر سوربھ بھاردواج اور راجیہ سبھا کے رکن سنجے سنگھ بھی ان کے ہمراہ موجود تھے۔

ہندوستھان سماچار

ہندوستان سماچار / Mohammad Khan