نئی دہلی، 21 جولائی (ہ س)۔ صدر جمہوریہ ہند دروپدی مرمو نے منگل کو کہا کہ اقتصادی تعاون ہندوستان اور شمالی مقدونیہ کے درمیان باہمی تعلقات کا ایک بہت اہم ستون ہے۔ دونوں ممالک نے تجارت اور سرمایہ کاری کو بڑھانے، کاروباری تعاون کو مضبوط بنانے اور دو طرفہ تجارت کو دوگنا کرنے کے لیے مل کر کام کرنے پر اتفاق کیا۔

شمالی مقدونیہ کے اپنے سرکاری دورے کے دوران، صدر جمہوریہ مرمو نے صدر گورڈانا سلجانوسکا-ڈیوکووا کے ساتھ دو طرفہ اور وفود کی سطح پر بات چیت کے بعد ایک مشترکہ بیان میں کہا کہ دونوں ممالک نے اطلاعاتی ٹیکنالوجی، زراعت، خوراک کی ڈبہ بندی ، دواسازی، ٹیکسٹائل، بایوٹیکنالوجی، مہمان نوازی اور فلم سازی جیسے شعبوں میں تعاون بڑھانے کی ضرورت پر تفصیلی تبادلہ خیال کیا۔ ہندوستان-شمالی مقدونیہبزنس فورم ان شعبوں میں نئے مواقع کو فروغ دینے کے لیے ایک اہم پلیٹ فارم ہوگا۔

صدر جمہوریہ نے کہا کہ صحت کی دیکھ بھال کے شعبے میں دونوں ممالک کے درمیان دوطرفہ معاہدے کی تجدید کی جا رہی ہے۔ روایتی ادویات کے نظام سمیت صحت کے شعبے میں تعاون کو مزید مستحکم کرنے کا بھی معاہدہ ہوا ہے۔ انہوں نے اس بات پر زور دیا کہ ثقافتی اور عوام سے عوام کے رابطے دونوں ممالک کے تعلقات کی مضبوط بنیاد ہیں۔ تخلیقی صنعتوں میں تعاون ثقافتی تبادلے کا ایک اہم ذریعہ بن جائے گا۔

صدر جمہوریہ مرمو نے کہا کہ ہندوستان بین الاقوامی سولر الائنس ( آئی ایس اے )، کولیشن فار ڈیزاسٹر ریسیلینٹ انفراسٹرکچر (سی ڈی آر آئی ) اور گلوبل بایو فیولز الائنس (جی بی اے ) جیسے اقدامات کے ذریعے عالمی تعاون کو فروغ دے رہا ہے۔ انہوں نے شمالی مقدونیہ کی ان اقدامات میں شامل ہونے کی خواہش کا خیرمقدم کرتے ہوئے کہا کہ اس سے اسے ماحول دوست توانائی اور ڈیزاسٹر مینجمنٹ کے شعبوں میں عالمی تجربے اور تکنیکی مہارت سے استفادہ کرنے کا موقع ملے گا۔

انہوں نے شمالی مقدونیہ کے لیے انڈین ٹیکنیکل اینڈ اکنامک کوآپریشن (آئی ٹی ای سی ) پروگرام کے تحت تربیتی نشستوں کی تعداد کو دوگنا کرنے کا اعلان کیا۔ ان تربیتی پروگراموں میں مصنوعی ذہانت (اے آئی ) کے کورسز بھی شامل ہوں گے۔

صدر جمہوریہ نے کہا کہ کسی ہندوستانی صدر کا شمالی مقدونیہ کا یہ پہلا سرکاری دورہ ہے اور انہیں یقین ہے کہ اس سے دونوں ممالک کے درمیان کثیر جہتی شراکت داری کو نئی تحریک ملے گی۔ انہوں نے بتایا کہ دورے کے دوران دونوں صدور مشترکہ طور پر اسکوپجے میوزیم میں مہاتما گاندھی کے مجسمے کی نقاب کشائی کریں گے جو دونوں ممالک کے درمیان مشترکہ جمہوری اقدار اور دوستانہ تعلقات کی علامت ہو گی۔

ہندوستھان سماچار

ہندوستان سماچار / محمد شہزاد