پٹنہ، 21 جولائی (ہ س)۔ وزیر اعلی سمراٹ چودھری کو ای میل کے ذریعے بھیجے گئے بم سے اڑانے کی دھمکی نے سیکورٹی ایجنسیوں کو ہلا کر رکھ دیا ہے۔ دھمکی میں وزیر اعلیٰ رہائش گاہ، وزیر اعلیٰ سکریٹریٹ، دانا پور میں چار اسکولوں اور گیاجی میں مرکزی پوسٹ دفتر اور پاسپورٹ دفتر کو آر ڈی ایکس سے اڑا کی دھمکی ملی ہے ۔ واقعے کے بعد پٹنہ اور گیاجی میں پولیس، بم اسکواڈ اور ڈاگ اسکواڈ کو تعینات کردیا گیا ہے۔ تمام حساس مقامات کی مکمل تلاشی لی جارہی ہے۔پولیس کے مطابق منگل کی صبح 7 بج کر 57 منٹ پر محکمہ دیہی ترقی کے سرکاری ای میل پر دھمکی آمیز پیغام موصول ہوا۔ ای میل میں دعویٰ کیا گیا تھا کہ بہار سکریٹریٹ میں سب سے پہلے دوپہر 3 بج کر 11 منٹ پر ایک بم پھٹ جائے گا۔ اس کے بعد 21 جولائی کو رات 9:11 بجے وزیراعلیٰ آفس اور وزیراعلیٰ کی رہائش گاہ پر بم پھٹے گا۔ ای میل موصول ہونے پر محکمہ کے جوائنٹ سکریٹری روی کمار نے فوری طور پر متعلقہ تھانے میں شکایت درج کرائی جس کے بعد سیکورٹی ایجنسیوں نے تحقیقات شروع کر دیں۔

یہ دھمکی ایسے وقت میں آیا ہے جب بہار قانون ساز اسمبلی کا مانسون اجلاس جاری ہے۔ اس کے پیش نظر پولیس ہیڈ کوارٹر نے سکیورٹی مزید سخت کر دی ہے۔ بم ڈسپوزل اسکواڈ اور ڈاگ اسکواڈ کی مدد سے سکریٹریٹ، وزیر اعلیٰ سکریٹریٹ، محکمہ دیہی ترقی اور دیگر سرکاری احاطے میں بڑے پیمانے پر سرچ آپریشن جاری ہے۔ دانا پور کے چار اسکولوں میں بھی سیکورٹی بڑھا دی گئی ہے اور وہاں بھی تحقیقات جاری ہیں۔دھمکی آمیز ای میل میں وزیر اعلیٰ سمراٹ چودھری پر کئی سنگین الزامات لگائے گئے ہیں۔ بھیجنے والا اپنی شناخت خالصتان کے حامی کے طور پر کی ہے اور دعویٰ کیا ہے کہ سنجے ورما نامی شخص بہار میں چھپا ہوا ہے اور اس نے خالصتان کے حامی ہردیپ سنگھ کے قتل کی منصوبہ بندی کی ہے۔ پولیس ان دعوؤں کی تحقیقات کر رہی ہے، حالانکہ ابھی تک ان الزامات کی سرکاری طور پر تصدیق نہیں ہو سکی ہے۔

اسی طرح گیاجی میں ہیڈ پوسٹ آفس اور ریجنل پاسپورٹ آفس کو بھی آر ڈی ایکس سے اڑانے کی دھمکیاں موصول ہوئی ہیں۔ بتایا گیا ہے کہ یہ دھمکی کئی ڈاکخانوں کو ای میل کے ذریعے بھیجی گئی تھی۔ گیاجی ہیڈ پوسٹ آفس کے سینئر پوسٹ ماسٹر پرنو کمار جھا نے بتایا کہ پٹنہ سرکل کی سطح سے ای میل موصول ہوئی تھی جس میں ممکنہ حملے کا ذکر کیا گیا تھا۔پرناو کمار جھا نے بتایا کہ ای میل میں دعویٰ کیا گیا ہے کہ جنوبی ہند کی اداکارہ نویدھا پیشوراج کے پیغمبر اسلام کے بارے میں مبینہ تبصرے پر غصے کی وجہ سے علاقائی پاسپورٹ آفس اور پوسٹ آفس کو آر ڈی ایکس بم دھماکوں کی دھمکی دی گئی تھی۔ انہوں نے کہا کہ پولیس اور متعلقہ سیکورٹی ایجنسیوں کو فوری طور پر معاملے کی اطلاع دی گئی۔ پوسٹ آفس اور پاسپورٹ آفس میں سیکورٹی بڑھا دی گئی ہے، اور تمام سرگرمیوں پر نظر رکھی جا رہی ہے۔

گیاجی کے سٹی سپرنٹنڈنٹ آف پولیس (سٹی ایس پی) ابھینو نے میڈیا کو بتایا کہ دھمکی ملنے پر پولیس لائن سے بم ڈسپوزل اسکواڈ روانہ کیا گیا۔ انہوں نے مزید کہا کہ پولیس ہر پہلو سے مکمل چھان بین کر رہی ہے اور دھمکیاں بھیجنے والے کی شناخت کے لیے سائبر ماہرین کی مدد بھی لے رہی ہے۔پولیس حکام کا کہنا ہے کہ اس وقت کسی جگہ سے کوئی دھماکہ خیز مواد نہیں ملا ہے۔ سیکورٹی ایجنسیاں ای میل کی تکنیکی جانچ، آئی پی ایڈریس کی تصدیق اور دیگر ڈیجیٹل شواہد کے ذریعے دھمکی بھیجنے والے کا پتہ لگانے کی کوشش کر رہی ہیں۔ انتظامیہ نے لوگوں پر زور دیا ہے کہ وہ افواہوں کو نظر انداز کریں اور کسی بھی مشکوک سرگرمی کی اطلاع فوری طور پر پولیس کو دیں۔

ہندوستھان سماچار

ہندوستان سماچار / Mohammad Afzal Hassan