حکومت کل گرمیوں کی تعطیلات میں توسیع کا فیصلہ کرے گی : وزیر سکینہ ایتوسرینگر، 18 جولائی (ہ س)۔ جموں و کشمیر کی حکومت موجودہ موسمی حالات کا جائزہ لینے کے بعد اسکولوں میں گرمیوں کی تعطیلات میں توسیع کرنے کے بارے میں اتوار کو حتمی فیصلہ لے گی۔ وزیر تعلیم سکینہ ایتو نے میڈیا نمائندوں سے بات کرتے ہوئے کہا کہ حکومت موسم پر گہری نظر رکھے ہوئے ہے اور اسکولوں کے دوبارہ کھلنے کے شیڈول سے قبل مناسب فیصلہ کرے گی۔ایتو نے کہا، گرمیوں کی چھٹیوں میں ابھی ایک دن باقی ہے۔ ہم موسمی حالات کا جائزہ لے رہے ہیں، اور حکومت جلد ہی تعطیلات بڑھانے کا فیصلہ کرے گی۔ انہوں نے کہا کہ طلباء کی صحت اور بہبود حکومت کی اولین ترجیح ہے۔ اس میں کوئی شک نہیں کہ کشمیر میں موسمی حالات بدل رہے ہیں۔ ہمارے لیے طلباء کی صحت کسی بھی چیز سے زیادہ اہم ہے۔‘‘ حکومت نے اس سے قبل کشمیر ڈویژن کے تمام اسکولوں اور جموں ڈویژن کے سرمائی علاقوں میں 6 جولائی سے 19 جولائی تک موسم گرما کی تعطیلات کا اعلان کیا تھا۔ دریں اثنا، محکمہ موسمیات نے موجودہ ہیٹ ویو 19 جولائی تک جاری رہنے کی پیش گوئی کی ہے اور 20 جولائی سے 23 جولائی کے درمیان شدید بارشوں اور سیلاب کے امکان سے خبردار کیا ہے۔ہندوستھان سماچار

ہندوستان سماچار / Aftab Ahmad Mir