بیڑ، 18 جولائی (ہ س): ضلع کے کیج تعلقہ میں سرکاری ملازمت دلانے کے نام پر ایک ماموں کی جانب سے اپنے ہی سگے بھانجے سے 19 لاکھ روپے کی دھوکہ دہی کرنے کا چونکا دینے والا معاملہ سامنے آیا ہے۔ الزام ہے کہ محکمہ مال میں کلرک کی ملازمت دلانے کا جھانسہ دے کر پربھنی ضلع و سیشن عدالت میں کلرک کے عہدے پر تعینات ماموں نے اپنے بھانجے سے لاکھوں روپے وصول کیے، لیکن نہ ملازمت دلائی اور نہ ہی رقم واپس کی۔ متاثرہ نوجوان کی شکایت پر پولیس نے ملزم ماموں کے خلاف مقدمہ درج کر لیا ہے۔

اس معاملے کے شکایت کنندہ کی شناخت 28 سالہ امول مدھوکر چگورے، ساکن تامبوا، تعلقہ کیج، ضلع بیڑ، کے طور پر ہوئی ہے، جبکہ مقدمہ درج ہونے والے ملزم کا نام دگڈو وٹھل راؤ ہنگرگے، عمر 48 سال، ساکن مولی نگر، جلال پور روڈ، پرلی وئجناتھ، حال مقیم پالَم، ضلع پربھنی، بتایا گیا ہے۔ ملزم دگڈو ہنگرگے پربھنی کے ضلع و سیشن عدالت میں کلرک کے عہدے پر خدمات انجام دے رہا ہے۔ پولیس کے مطابق ملزم نے اپنے بھانجے کو اعتماد میں لے کر یہ یقین دلایا تھا کہ وہ محکمہ مال میں کلرک یا ریونیو اسسٹنٹ کی سرکاری ملازمت دلا سکتا ہے۔ اس کے عوض اس نے 19 لاکھ روپے کا مطالبہ کیا۔

اپنے ماموں پر اعتماد کرتے ہوئے امول چگورے نے 7 جون 2022 اور 5 جولائی 2022 کو اسٹیٹ بینک آف انڈیا کی کیج شاخ سے آن لائن آر ٹی جی ایس کے ذریعے رقم منتقل کی، جبکہ بعد ازاں 8 جنوری 2023 کو کچھ رقم نقد ادا کی۔ اس طرح اس نے مجموعی طور پر 19 لاکھ روپے اپنے ماموں کو دے دیے۔ شکایت کے مطابق تین برس گزر جانے کے باوجود نہ تو سرکاری ملازمت ملی اور نہ ہی رقم واپس کی گئی۔ جب بھی امول چگورے نے ماموں سے ملازمت یا رقم کے بارے میں پوچھا تو وہ مسلسل جھوٹے وعدے کرتا رہا اور بعد میں رقم واپس کرنے سے بھی انکار کر دیا۔ خود کے ساتھ دھوکہ دہی کا احساس ہونے پر امول چگورے نے کیج پولیس اسٹیشن میں شکایت درج کرائی۔

شکایت کی بنیاد پر کیج پولیس اسٹیشن میں جرم رجسٹر نمبر 453/2026 کے تحت ملزم دگڈو ہنگرگے کے خلاف بھارتیہ تعزیرات ہند کی دفعات 420، 406، 468 اور 471 کے تحت دھوکہ دہی، مجرمانہ خیانت اور جعلسازی سے متعلق مقدمہ درج کیا گیا ہے۔ کیج پولیس اسٹیشن کے انچارج پولیس انسپکٹر راہل سوریہ تل کی نگرانی میں پولیس سب انسپکٹر امیش نکم اس مقدمے کی مزید تفتیش کر رہے ہیں۔

ہندوستھان سماچار

--------------------

ہندوستان سماچار / جاوید این اے