جموں, 15 جولائی (ہ س)۔
جموں و کشمیر اور لداخ ہائی کورٹ نے تجارتی تنازعات اور ثالثی سے متعلق مقدمات کی مؤثر سماعت کے لیے سرینگر اور جموں ونگ میں کمرشل ڈویژن بینچوں کی ازسرِ نو تشکیل کر دی ہے۔
ہائی کورٹ کے رجسٹرار جنرل کی جانب سے جاری حکم کے مطابق یہ بینچ کمرشل کورٹس ایکٹ، 2015 کے تحت دائر ہونے والے تجارتی مقدمات، درخواستوں اور ثالثی سے متعلق معاملات کی سماعت اور ان کا فیصلہ کریں گے۔ یہ حکم 25 ستمبر 2024 کو جاری سابقہ حکم نامہ منسوخ کرتے ہوئے فوری طور پر نافذ کیا گیا ہے اور آئندہ احکامات تک مؤثر رہے گا۔
حکم نامے کے مطابق سرینگر ونگ کے کمرشل ڈویژن بینچ میں جسٹس موکشا کھجوریا کاظمی اور جسٹس شہزاد عظیم شامل ہوں گے، جبکہ جموں ونگ میں جسٹس راجیش سیکھری اور جسٹس سنجے پریہار پر مشتمل بینچ تجارتی مقدمات کی سماعت کرے گا۔
حکم کے مطابق ہائی کورٹ کے اصل دائرۂ اختیار میں زیرِ التوا یا آئندہ دائر ہونے والے تمام تجارتی تنازعات اور ان سے متعلق ثالثی کی کارروائیاں انہی خصوصی بینچوں کے سپرد ہوں گی۔
یہ حکم رجسٹرار جنرل ایم کے شرما نے قائم مقام چیف جسٹس کی منظوری کے بعد جاری کیا ہے۔
ہندوستھان سماچار
---------------
ہندوستان سماچار / محمد اصغر
