پونچھ میں ریچھ کے حملے میں ایک شخص شدید زخمی
جموں، 14 جولائی (ہ س)۔ جموں و کشمیر کے ضلع پونچھ میں ریچھ کے حملے میں 56 سالہ شخص شدید زخمی ہو گیا۔ گزشتہ دو ہفتوں کے دوران ضلع میں ریچھ کے حملے کا یہ چوتھا واقعہ ہے، جس کے بعد مقامی لوگوں میں تشویش پائی جا رہی ہے۔سرکاری ذرائع کے مطابق سندری گاؤں کے رہائشی محمد صادق گجر پر منگل کی دوپہر ان کے گھر کے قریب اچانک ایک ریچھ نے حملہ کر دیا، جس کے نتیجے میں وہ شدید زخمی ہو گئے۔
محمد صادق گجر کی چیخ و پکار سن کر مقامی افراد موقع پر پہنچے اور انہیں ریچھ کے چنگل سے بچایا۔ لوگوں کے پہنچنے سے قبل ریچھ قریبی جنگل میں فرار ہو گیا۔زخمی کو فوری طور پر سوَجیاں کے طبی سنٹر منتقل کیا گیا، جہاں ابتدائی طبی امداد فراہم کرنے کے بعد انہیں مزید علاج کے لیے پی ایچ سی بھیج دیا گیا۔
ادھر جنگلات سے متصل علاقوں کے رہائشیوں نے مسلسل بڑھتے ہوئے ریچھ کے حملوں پر تشویش کا اظہار کرتے ہوئے محکمہ وائلڈ لائف سے مطالبہ کیا ہے کہ ایسے واقعات کی روک تھام اور شہریوں کے تحفظ کے لیے فوری اور مؤثر اقدامات کیے جائیں۔
ہندوستھان سماچار
---------------
ہندوستان سماچار / محمد اصغر
