باندہ، 12 جولائی (ہ س) اترپردیش کے باندہ ضلع کے بسنڈا تھانہ علاقے کے تحت واقع کوراہی گاوں میں ایک چونکا دینے والا واقعہ سامنے آیا ہے۔ سنیچر کی دیر شام، ایک نوجوان نے ایک خاتون کو تیز دھار ہتھیار سے بے دردی سے قتل کر دیا کیونکہ اس نے اپنی بیٹی کی اس سے محبت کی شادی کی مخالفت کی تھی۔ اس سنسنی خیز جرم سے پورے علاقے میں خوف و ہراس کا ماحول ہے۔ پولیس نے اس معاملے میں داماد سمیت تین افراد کو گرفتار کر لیا ہے۔

بانو (46) زوجہ مرحوم راجوساکن کوراہی گاوں کی بیٹی عالیہ کا معاشقہ اسی گاوں میں رہنے والے لکشمی کے بیٹے لوکش ورما سے چل رہا تھا۔ جب بانو کو اس رشتے کا علم ہوا تو اس نے سختی سے مخالفت کی۔ وہ نہیں چاہتی تھی کہ اس کی بیٹی لوکشسے شادی کرے۔ اس کے باوجود بیٹی نے اپنی ماں کی خواہشات سے انکار کیا اور لوکش سے شادی کر لی۔ بتایا جاتا ہے کہ شادی کے بعد بھی ماں نے اس کی مخالفت جاری رکھی۔ اس سے مشتعل ہو کر ملزم نے ہفتہ کی دیر رات اپنی ساس پر تیز دھار ہتھیار سے حملہ کر دیا جس سے وہ موقع پر ہی جاں بحق ہو گئیں۔

واقعہ کی اطلاع ملتے ہی سرکل آفیسر (صدر) سوربھ سنگھ کی قیادت میں پولیس کی بھاری نفری اور ایک فارنسک ٹیم جائے وقوعہ پر پہنچی۔ سرکل آفیسر سوربھ سنگھ نے بتایا کہ پولیس کو ہفتہ کو کوراہی گاوں میں خاتون کے قتل کی اطلاع ملی۔ ابتدائی تحقیقات سے معلوم ہوا ہے کہ متوفی کی بالغ بیٹی نے مقامی نوجوان کے ساتھ محبت کی شادی کی تھی، متوفیہ اس رشتے کی مسلسل مخالفت کررہی تھی۔ اسی دشمنی میں نوجوان نے خاتون کو قتل کر دیا۔

پولیس نے لاش کو تحویل میں لے کر پوسٹ مارٹم کے لیے بھیج دیا ہے۔ موصول ہونے والی باضابطہ شکایت کی بنیاد پر متعلقہ دفعات کے تحت مقدمہ درج کیا گیا ہے۔ پولیس نے بروقت کارروائی کرتے ہوئے تینوں نامزد ملزمان کو گرفتار کر لیاہے، مزید قانونی کارروائی جاری ہے۔

اس واقعے نے ایک بار پھر معاشرے میں ان ہولناک نتائج کے حوالے سے وسیع بحث چھیڑ دی ہے جو رومانوی تعلقات اور خاندانی جھگڑوں سے پیدا ہو سکتے ہیں۔

---------------

ہندوستان سماچار / عبدالسلام صدیقی