جموں، 12 جولائی (ہ س)۔

شری امرناتھ یاترا میں عقیدت مندوں کا جوش و خروش برقرار ہے۔ اتوار کو مزید 9,153 تیرتھ یاتری سخت حفاظتی انتظامات کے درمیان جموں کے بھگوتی نگر بیس کیمپ سے مقدس امرناتھ گپھا کی جانب روانہ ہوئے، جس کے ساتھ ہی جموں سے روانہ ہونے والے تیرتھ یاتریوں کی مجموعی تعداد تقریباً 80 ہزار تک پہنچ گئی ہے۔

سرکاری حکام کے مطابق اتوار کو 359 گاڑیوں پر مشتمل جتھہ جموں سے روانہ ہوا۔ ان میں 3,429 یاتری 149 گاڑیوں میں بالتل کے مختصر مگر دشوار گزار راستے سے جبکہ 5,724 یاتری 210 گاڑیوں میں روایتی پہلگام راستے سے مقدس گپھا کے لیے روانہ ہوئے۔

حکام نے بتایا کہ اس قافلے میں 6,522 مرد، 2,233 خواتین، 18 بچے، 267 سادھو، 112 سادھویاں اور پانچ خواجہ سرا شامل تھے۔ اتوار کے قافلے کے بعد جموں سے امرناتھ یاترا کے لیے روانہ ہونے والے یاتریوں کی مجموعی تعداد 79,816 ہو گئی ہے۔

بالتل راستے سے جانے والے یاتری ناشری ٹنل عبور کرنے کے بعد بانہال کے لمبر گراؤنڈ میں قیام کریں گے، جہاں ان کے لیے ناشتے اور دیگر بنیادی سہولیات کا انتظام کیا گیا ہے۔ دوسری جانب پہلگام راستے سے جانے والے یاتری رام بن کے چندرکوٹ لنگر مقام پر ناشتے کے بعد اپنی منزل کی جانب روانہ ہوں گے۔

انتظامیہ نے یاترا کے محفوظ اور پُرامن انعقاد کے لیے سخت حفاظتی بندوبست، طبی امداد، صحت کی سہولیات اور دیگر ضروری انتظامات کیے ہیں۔

واضح رہے کہ شری امرناتھ جی یاترا کا آغاز 3 جولائی کو ہوا تھا اور یاترا میں عقیدت مندوں کی بڑی تعداد مسلسل شرکت کر رہی ہے۔ لیفٹیننٹ گورنر منوج سنہا کے مطابق یاترا کے ابتدائی آٹھ دنوں میں دو لاکھ سے زائد عقیدت مند مقدس گپھا میں درشن کر چکے ہیں۔

ہندوستھان سماچار

ہندوستان سماچار / محمد اصغر