ممبئی ، 11 جولائی (ہ س) ۔ مہاراشٹر کے ضلع تھانے میں ہفتہ کے روز تین مختلف مقامات پر عمارتیں منہدم ہونے کے الگ الگ واقعات میں ایک 12 سالہ بچے کی موت ہو گئی جبکہ چار افراد زخمی ہو گئے۔ تمام زخمیوں کو قریبی اسپتالوں میں داخل کرایا گیا ہے، جہاں ان کا علاج جاری ہے۔ پولیس نے تینوں واقعات کی تحقیقات شروع کر دی ہیں۔تھانے میونسپل کارپوریشن کے ترجمان کے مطابق گھوڑبندر کے آزاد نگر علاقے میں واقع مدراس چال میں ہفتہ کی دوپہر دو مکانات اچانک منہدم ہو گئے۔ اطلاع ملتے ہی فائر بریگیڈ کی ٹیمیں موقع پر پہنچ گئیں اور ملبے میں پھنسے تین افراد کو نکال کر فوری طور پر قریبی اسپتال منتقل کیا۔ اسپتال میں ڈاکٹروں نے 12 سالہ جئے کمار جیسوال کو مردہ قرار دیا، جبکہ 35 سالہ ارمیلا جیسوال اور 9 سالہ ونیت جیسوال زخمی ہوئے۔ دونوں زخمیوں کا علاج ٹائٹن اسپتال میں جاری ہے۔دوسرا واقعہ تھانے کے کھنڈوپاڑا علاقے میں پیش آیا، جہاں ہفتہ کی صبح تقریباً آٹھ بجے ایک منزلہ مکان کی چھت اچانک گر گئی۔ اس حادثے میں ایک شخص معمولی زخمی ہوا، جسے علاج کے لیے قریبی اسپتال منتقل کیا گیا۔ خوش قسمتی سے اس واقعے میں کوئی بڑا جانی یا مالی نقصان نہیں ہوا۔ تیسرا حادثہ نوی ممبئی کے سی ووڈس علاقے کے سیکٹر 48 میں واقع سائی پرساد سوسائٹی میں پیش آیا، جہاں ایک رہائشی مکان کی چھت کا ایک حصہ اچانک گرنے سے سریش سالونکھے شدید زخمی ہو گئے۔ اگرچہ اس حادثے میں کوئی جانی نقصان نہیں ہوا، تاہم اس واقعے نے پرانی عمارتوں کی حفاظت اور مضبوطی پر کئی سوالات کھڑے کر دیے ہیں۔حادثات کے بعد مقامی شہری فوری طور پر امدادی کارروائیوں میں شامل ہوئے اور زخمیوں کو اسپتال پہنچانے میں مدد کی۔ تینوں واقعات کے بعد متعلقہ پولیس نے مقدمات درج کرکے تفصیلی تحقیقات شروع کر دی ہیں، جبکہ حادثات کی وجوہات معلوم کرنے کے لیے تکنیکی جانچ بھی کی جا رہی ہے۔

ہندوستھان سماچار

--------------------

ہندوستان سماچار / جاوید این اے