روہتاس،11جولائی(ہ س)۔بہار کے روہتاس ضلع میں چھ سال قبل ایک نابالغ لڑکی کی عصمت دری اوروحشیانہ قتل معاملے میں عدالت نے سخت فیصلہ سنایا ہے۔ ایڈیشنل ڈسٹرکٹ اینڈ سیشن جج 7 اروند نے ملزم بلیرام سنگھ کو مجرم قراردیتے ہوئے موت کی سزا سنائی۔ عدالت نے متاثرہ کی والدہ کو 50,000 روپے کی مالی امداد کا بھی حکم دیا۔15 نومبر 2020 کو دیوالی کے دن ملزم بلیرام سنگھ نے 10 سالہ بچی کو کھلونے اور چاکلیٹ کے لالچ میں اپنے گھر لے گیا۔ وہاں اس نے اس کی عصمت دری کی اور بعد میں اسے قتل کر دیا۔ گرفتاری کے خوف سے ملزم نے لڑکی کی لاش اپنے گھر میں لکڑی کے ڈبے میں رکھ کر دوسرے گھر میں چھپا دی۔ گاؤں والوں نے بلیرام سنگھ کو لڑکی کے ساتھ جاتے ہوئے دیکھ لیا تھا۔ ان کی گواہی کی بنیاد پر پولیس نے ملزم کے گھر کی تلاشی لی اور ایک صندوق سے لڑکی کی لاش برآمد کی۔ پوکسو ایکٹ کے تحت مقدمہ درج کیا گیا تھا۔ پولیس نے بروقت کارروائی کرتے ہوئے ملزم کو گرفتار کر لیا۔مقدمے کی سماعت کے دوران استغاثہ نے 11 گواہوں کے بیانات قلمبند کئے۔ اسپیشل پبلک پراسیکوٹر ہیرا پرتاپ سنگھ نے کہا کہ ثبوتوں اور گواہوں کے بیانات کی بنیاد پر عدالت نے ملزم کو مکمل طور پر قصوروار پایا۔ جج نے تمام شواہد کا جائزہ لینے کے بعد فیصلہ سنایا۔ہندوستھان سماچار

ہندوستان سماچار / Mohammad Afzal Hassan