جموں, 11 جولائی (ہ س): محکمہ موسمیات کی تازہ پیش گوئی کے بعد ضلع انتظامیہ کشتواڑ نے 14 جولائی تک ہلکی سے درمیانی بارش، گرج چمک، آسمانی بجلی اور تیز ہواؤں کے امکان کے پیش نظر موسمی انتباہ جاری کرتے ہوئے عوام سے محتاط رہنے کی اپیل کی ہے۔ انتظامیہ کے مطابق ضلع کے بالائی اور پہاڑی علاقوں میں اس دوران بارش کی سرگرمیاں بڑھ سکتی ہیں، جس کے باعث ندی نالوں، دریاؤں اور زمین کھسکنے کے خطرات والے مقامات کے نزدیک رہنے والے افراد کو خصوصی احتیاط برتنے کی ہدایت دی گئی ہے۔ لوگوں سے کہا گیا ہے کہ وہ غیر ضروری سفر سے گریز کریں اور موسم بہتر ہونے تک حفاظتی تدابیر پر سختی سے عمل کریں۔ ڈپٹی کمشنر کشتواڑ نے محکمہ مال، تعمیرات عامہ، پردھان منتری گرام سڑک یوجنا، بجلی، جل شکتی، صحت، آبپاشی و فلڈ کنٹرول، این ایچ آئی ڈی سی ایل اور بارڈر روڈز آرگنائزیشن سمیت تمام متعلقہ محکموں کو ہائی الرٹ رہنے کی ہدایت دی ہے۔ افسران اور فیلڈ عملے کو کسی بھی ہنگامی صورتحال سے نمٹنے اور بنیادی خدمات کی فوری بحالی کے لیے تیار رہنے کو کہا گیا ہے۔

تمام تحصیلداروں کو بھی ہدایت دی گئی ہے کہ جانی نقصان، املاک کو پہنچنے والے نقصان، سڑکوں کی بندش یا موسم سے متعلق کسی بھی واقعے کی فوری اطلاع ڈپٹی کمشنر کے دفتر کو دیں تاکہ بروقت راحت اور بچاؤ کی کارروائیاں انجام دی جا سکیں۔ عوامی سہولت کے لیے ڈپٹی کمشنر دفتر میں ضلع کنٹرول روم کو چوبیس گھنٹے کے لیے فعال کر دیا گیا ہے۔ انتظامیہ نے عوام سے اپیل کی ہے کہ وہ سرکاری موسمی ہدایات پر عمل کریں اور موسم معمول پر آنے تک سیلاب، دریا کناروں اور زمین کھسکنے کے خطرات والے علاقوں کا رخ کرنے سے گریز کریں۔

ہندوستھان سماچار

---------------

ہندوستان سماچار / محمد اصغر