جموں، 10 جولائی (ہ س)۔ مغربی ہواؤں کے ایک سرگرم سلسلے اور مانسون کے کم دباؤ والے نظام کے باہمی اثرات کے باعث جموں و کشمیر میں 11 سے 13 جولائی کے دوران بارش میں نمایاں اضافہ ہونے کا امکان ہے۔ کشمیر ویدر فورکاسٹ کی جانب سے جاری تازہ پیش گوئی کے مطابق 11 اور 12 جولائی کو موسمی سرگرمی اپنے عروج پر رہنے کی توقع ہے۔پیش گوئی میں کہا گیا ہے کہ جموں خطے کے متعدد علاقوں میں نہایت شدید بارش ہوسکتی ہے، جبکہ وادی کشمیر میں درمیانی سے شدید بارشوں کا امکان ظاہر کیا گیا ہے۔

ماہرین کے مطابق شدید بارش کے باعث بعض مقامات پر اچانک سیلاب، ندی نالوں میں طغیانی، لینڈ سلائیڈنگ اور سڑکوں کی آمد و رفت متاثر ہونے کا خدشہ ہے۔ عوام کو مشورہ دیا گیا ہے کہ خراب موسمی حالات کے دوران غیر ضروری سفر سے گریز کریں اور انتظامیہ کی جانب سے جاری ہدایات پر عمل کریں۔

کشمیر ویدر فورکاسٹ نے متعلقہ محکموں کو بھی ممکنہ ہنگامی صورتحال سے نمٹنے کے لیے پیشگی تیاریاں مکمل رکھنے کی تلقین کی ہے۔

ہندوستھان سماچار

---------------

ہندوستان سماچار / محمد اصغر