جموں, 10 جولائی (ہ س) جموں و کشمیر میں لیفٹیننٹ گورنر منوج سنہا کی ہدایت پر جاری سو روزہ انسدادِ منشیات مہم کے دوران جموں زون پولیس نے منشیات فروشوں کے خلاف بڑے پیمانے پر کارروائیاں کرتے ہوئے 962 مقدمات درج کیے ہیں اور 1140 ملزمان کو گرفتار کیا ہے۔

پولیس کے مطابق 11 اپریل سے 6 جولائی تک جاری مہم کے دوران 15 کلوگرام ہیروئن، 49 کلوگرام گانجا، 30 کلوگرام پوست اور 6 کلوگرام چرس برآمد کی گئی۔ اس کے علاوہ پی آئی ٹی۔این ڈی پی ایس قانون کے تحت 30 بدنام زمانہ منشیات فروشوں کو حراست میں لیا گیا۔

حکام نے بتایا کہ منشیات کی اسمگلنگ سے حاصل کی گئی آمدنی سے وابستہ 82 جائیدادیں ضبط کی گئی ہیں، جبکہ 140 کنال اراضی پر کی جانے والی ممنوعہ نشہ آور فصلوں کی کاشت کو بھی تباہ کر دیا گیا۔ مزید 121 ڈرائیونگ لائسنس منسوخ اور 153 گاڑیوں کی رجسٹریشن معطل کی گئی۔

پولیس نے منشیات کے خلاف عوامی بیداری مہم بھی بھرپور انداز میں جاری رکھی۔ اس دوران 4045 ادویات فروشوں اور کیمسٹ دکانوں کا معائنہ کیا گیا، جبکہ 2125 بیداری پروگرام منعقد کیے گئے جن میں لاکھوں افراد نے شرکت کی۔

جموں زون کے انسپکٹر جنرل پولیس بھیم سین توتی نے کہا کہ منشیات فروشوں اور ان کے نیٹ ورک کے خلاف کارروائیاں مزید مؤثر انداز میں جاری رہیں گی۔ انہوں نے کہا کہ صرف گرفتاریاں ہی کافی نہیں بلکہ منشیات کے کاروبار کی مالی بنیادوں کو بھی ختم کیا جا رہا ہے تاکہ اس سماجی برائی کا مکمل خاتمہ ممکن بنایا جا سکے۔

انہوں نے عوام سے اپیل کی کہ منشیات کی خرید و فروخت یا اسمگلنگ سے متعلق کوئی بھی اطلاع فوری طور پر پولیس کو دیں تاکہ نوجوان نسل کو اس لعنت سے محفوظ رکھا جا سکے۔

ہندوستھان سماچار

---------------

ہندوستان سماچار / محمد اصغر