ایم پی ایس سی امتحانات او ایم آر طریقہ سے لینے کے مطالبے پر لاتور میں طلبہ کا احتجاجلاتور، 10 جولائی (ہ س)۔ مہاراشٹر پبلک سروس کمیشن (ایم پی ایس سی) اور دیگر مسابقتی امتحانات آن لائن سی بی ٹی کے بجائے آف لائن او ایم آر طریقہ سے منعقد کرنے، ٹیچر ایلیجبلٹی ٹیسٹ (ٹی ای ٹی) بھی آف لائن لینے اور پولیس بھرتی کے لیے عمر کی حد میں رعایت دینے سمیت مختلف مطالبات کے حق میں لاتور میں طلبہ نے ایک احتجاجی مارچ نکالا۔ مارچ کے بعد لاتور ضلع طلبہ رابطہ کمیٹی کی جانب سے ضلع کلکٹر کے توسط سے اپنے مطالبات پر مبنی ایک یادداشت ریاستی حکومت کو پیش کی گئی۔طلبہ رابطہ کمیٹی نے اپنے مطالباتی مکتوب میں کہا کہ اس وقت ایم پی ایس سی اور مختلف سرکاری محکموں کی مسابقتی امتحانات کمپیوٹر بیسڈ ٹیسٹ (سی بی ٹی) طریقہ سے منعقد کیے جا رہے ہیں، جس کے باعث خصوصاً دیہی علاقوں اور متوسط و غریب گھرانوں سے تعلق رکھنے والے امیدواروں کو متعدد تکنیکی مشکلات کا سامنا کرنا پڑتا ہے۔یادداشت میں کہا گیا کہ امتحانات کے دوران پیش آنے والی تکنیکی خرابیاں، شفافیت سے متعلق خدشات اور نارملائزیشن کے طریقہ کار کے باعث امیدواروں کو نقصان اٹھانا پڑتا ہے، جس سے طلبہ کے درمیان بے یقینی اور عدم اعتماد کی فضا پیدا ہو رہی ہے۔ طلبہ نے مطالبہ کیا کہ ایم پی ایس سی کے امتحانات پہلے کی طرح آف لائن او ایم آر طریقہ سے منعقد کیے جائیں۔ اس کے علاوہ آئندہ ٹیچر ایلیجبلٹی ٹیسٹ (ٹی ای ٹی) بھی آف لائن منعقد کیا جائے تاکہ تمام امیدواروں کو یکساں اور منصفانہ مواقع میسر آ سکیں۔طلبہ نے یہ مطالبہ بھی کیا کہ کئی برسوں سے پولیس بھرتی کی تیاری کرنے والے امیدواروں کو راحت فراہم کرنے کے لیے پولیس بھرتی میں عمر کی حد میں مناسب رعایت دی جائے تاکہ وہ بھی بھرتی کے عمل میں حصہ لے سکیں۔ طلبہ رابطہ کمیٹی نے کہا کہ یہ تمام مطالبات ریاست کے لاکھوں طلبہ کے مستقبل سے وابستہ ہیں، اس لیے حکومت کو ان پر سنجیدگی سے غور کرتے ہوئے فوری طور پر مثبت فیصلہ کرنا چاہیے۔ کمیٹی نے متنبہ کیا کہ اگر مطالبات منظور نہ کیے گئے تو ریاست بھر میں جمہوری طریقے سے وسیع پیمانے پر احتجاجی تحریک شروع کی جائے گی۔ہندوستھان سماچار--------------------

ہندوستان سماچار / جاوید این اے