برقی حادثے کے بعد انتظامیہ اور عوامی نمائندوں کی ہنگامی میٹنگ، حفاظتی اقدامات سخت کرنے کی ہدایت

علی گڑھ، 10 جولائی (ہ س)۔

علی گڑھ میں حالیہ برقی کرنٹ سے پیش آئے افسوسناک حادثے کے بعد ضلع انتظامیہ اور عوامی نمائندوں نے بجلی محکمہ کے اعلیٰ افسران کے ساتھ جائزہ میٹنگ منعقد کی۔ میٹنگ میں حفاظتی انتظامات مضبوط بنانے، محکمانہ جوابدہی طے کرنے اور آئندہ ایسے حادثات کی روک تھام کے لیے مؤثر اقدامات پر زور دیا گیا۔ میٹنگ میں کول کے رکن اسمبلی انل پاراشر اور شہر کی رکن اسمبلی مکتا سنجیو راجہ نے ہدایت دی کہ متوفیہ کے اہل خانہ کو ضابطے کے مطابق جلد از جلد پانچ لاکھ روپے کی مالی امداد فراہم کی جائے۔ انہوں نے بجلی کے جھولتے تاروں، خراب ٹرانسفارمروں اور دیگر خطرناک مقامات کو فوری طور پر درست کرنے، عوام سے مسلسل رابطہ رکھنے اور حفاظتی معیار پر سختی سے عمل کرنے کی ہدایت دی۔

چیف انجینئر اروند کمار نائک نے حادثے پر افسوس کا اظہار کرتے ہوئے کہا کہ غفلت کے معاملے کی تحقیقات جاری ہیں اور قصورواروں کے خلاف سخت کارروائی کی جائے گی۔ انہوں نے بتایا کہ ضلع میں بجلی کے نظام کو محفوظ اور مضبوط بنانے کے لیے کروڑوں روپے کے ترقیاتی کام مکمل کیے جا چکے ہیں، جبکہ سال 2026-27 کے منصوبے کے تحت نئے سب اسٹیشن، ٹرانسفارمروں کی استعداد میں اضافہ اور بوسیدہ بجلی لائنوں کی تبدیلی جیسے اہم کام بھی کیے جائیں گے۔

میٹنگ میں اس بات پر اتفاق کیا گیا کہ شہریوں کی جان و مال کے تحفظ کے لیے انتظامیہ، عوامی نمائندوں اور بجلی محکمہ کے باہمی تعاون سے بروقت اور مؤثر اقدامات یقینی بنائے جائیں گے۔

ہندوستھان سماچار

ہندوستان سماچار / سید کامران علی گڑھ