دہرادون ، یکم جولائی (ہ س)۔ اتراکھنڈ مائنارٹی ایجوکیشن اتھارٹی (یو ایس اے ایم ای) بدھ سے اتراکھنڈ میں نافذ ہوگئی۔ اس کے ساتھ ہی اتراکھنڈ مدرسہ ایجوکیشن بورڈ ایکٹ اور غیر سرکاری عربی فارسی مدرسہ ریکگنیشن رولز کو ختم کر دیا گیا۔ نئے نظام کے تحت ریاست کے 452 رجسٹرڈ مدارس سمیت تمام اقلیتی تعلیمی اداروں کو مقررہ ضوابط کے مطابق تسلیم حاصل کرنے کی ضرورت ہوگی۔
وزیر اعلیٰ پشکر سنگھ دھامی نے بدھ کو جاری کردہ ایک پوسٹ میں لکھا کہ وزیر اعظم نریندر مودی کی رہنمائی میں ریاستی حکومت ایک جدید ، شفاف ، معیاری اور جوابدہ تعلیمی نظام کی تعمیر کے لیے پرعزم ہے۔ انہوں نے کہا کہ نیا نظام تمام اقلیتی تعلیمی اداروں کے لیے یکساں اور شفاف ایکریڈیشن سسٹم کو یقینی بنائے گا اور تعلیم کے معیار اور جوابدہی کو مضبوط کرے گا۔ انہوں نے کہا کہ حکومت کا مقصد ریاست کے بچوں کو جدید تعلیم، سائنس ، ٹکنالوجی ، ہنر مندی اور ہندوستانی زندگی کی اقدار سے بااختیار بنانا ہے، تاکہ وہ ایک ترقی یافتہ اتراکھنڈ اور ترقی یافتہ ہندوستان کی تعمیر میں موثر کردار ادا کر سکیں۔
نئے نظام کے تحت، ریاست کے 452 رجسٹرڈ مدارس کو پہلے اتراکھنڈ بورڈ آف اسکول ایجوکیشن سے الحاق حاصل کرنا ہوگا ، جس کے بعد انہیں اقلیتی تعلیمی اتھارٹی کی جانب سے تسلیم کیا جائے گا۔ ہر تسلیم تین تعلیمی سالوں ے لیے درست ہوگا۔ اتھارٹی کو یہ اختیار بھی حاصل ہوگا کہ وہ اداروں کا معائنہ کرے اور اگر وہ خلاف ورزیاں پائے تو سماعت کے بعد ان کی شناخت منسوخ کردے۔ریاستی حکومت کے مطابق نیا نظام مسلم، عیسائی ، سکھ ، بدھ ، جین اور پارسی برادریوں سے تعلق رکھنے والے اقلیتی تعلیمی اداروں پر یکساں طور پر لاگو ہوگا۔ اداروں کو نامزد پورٹل پر آن لائن درخواست کے ساتھ مطلوبہ دستاویزات اور فیس جمع کرنے کی ضرورت ہوگی۔
محکمہ اقلیتی بہبود کے خصوصی سکریٹری ڈاکٹر پراگ مدھوکر دھکاٹے نے بتایا کہ اتھارٹی نے یکم جولائی کو نئے نظام کے تحت ایکریڈیشن کا کام شروع کر دیا ہے۔ انہوں نے وضاحت کی کہ اتراکھنڈ اس نظام کو نافذ کرنے والی ملک کی پہلی ریاست ہے۔ انہوں نے کہا کہ نئے نظام کے تحت بدھ کی سہ پہر چیف منسٹر کی رہائش گاہ پر منعقدہ ایک پروگرام میں اقلیتی تعلیمی اداروں کے شناختی اسناد تقسیم کئے جائیں گے۔ نو اقلیتی تعلیمی اداروں کو تسلیم کیا جائے گا ، جن میں ایک جین ، ایک سکھ اور سات مدارس شامل ہیں۔
ہندوستھان سماچار
ہندوستان سماچار / Mohammad Khan
