پٹنہ،07(ہ س)۔ بہار میں موسم کا مزاج بدل رہا ہے ۔ گرمی کے درمیان بارش کی سرگرمیاں بڑھ گئی ہیں۔ پٹنہ موسمیاتی مرکز نے 7 سے 9 جون تک ریاست کے 27 اضلاع میں گرج چمک کے ساتھ آندھی اور بھاری بارش کے لیے یلو الرٹ جاری کیا ہے۔ اس دوران کئی علاقوں میں 50-60 کلومیٹر فی گھنٹہ کی رفتار سے تیز ہوائیں چلنے اور آسمانی بجلی گرنے کی وارننگ دی گئی ہے۔
راجدھانی پٹنہ سمیت سیتامڑھی، شیوہر، مظفر پور، مدھوبنی، دربھنگہ، سپول، ارریہ، کشن گنج، پورنیہ، مدھے پورہ، سہرسہ، سمستی پور، ویشالی، بیگوسرائے، کھگڑیا، بھاگلپور، مونگیر، لکھی سرائے، شیخ پورہ ، نالندہ، جہان آباد، گیا ، نوادہ ، جموئی اور بانکا میں یلو الرٹ جاری کیا گیا ہے۔ ان اضلاع میں 40-50 کلومیٹر فی گھنٹہ کی رفتار سے تیز ہواؤں اور گرج چمک کی توقع ہے۔ کئی اضلاع میں بارش بھی متوقع ہے۔
موسم کی یہ تبدیلی بعض علاقوں میں جان لیوا ثابت ہوئی ہے۔ 24 گھنٹوں کے اندر ریاست کے مختلف حصوں میں آسمانی بجلی گرنے سے چار افراد ہلاک ہو گئے۔ ان میں جموئی، مونگیر، بانکا اور بکسر اضلاع شامل ہیں۔ ڈیزاسٹر مینجمنٹ ڈیپارٹمنٹ اور مقامی انتظامیہ نے عوام سے اپیل کی ہے کہ وہ خراب موسم میں محفوظ رہیں اور درختوں یا بجلی کے کھمبوں کے نیچے پناہ لینے سے گریز کریں۔
ہفتہ کے روز پٹنہ کے کئی حصوں میں ہلکی بارش ہوئی، جس سے نمی اور شدید گرمی سے خاصی راحت ملی ۔ ماہرین موسمیات کے مطابق پٹنہ کے آسمان پر اتوار کے روز بھی بادل چھائے رہیں گے۔ شہر میں ہلکی بوندا باندی اور تیز ہوائیں چلنے کا امکان ہے۔
گرمی اور بارش کی وجہ سے ریاست میں درجہ حرارت میں مسلسل اتار چڑھاؤ ہو رہا ہے۔ گزشتہ 24 گھنٹوں کے دوران کئی اضلاع میں درجہ حرارت میں کمی ہوئی۔ سب سے کم زیادہ سے زیادہ درجہ حرارت پورنیہ میں 31.4 ڈگری سیلسیس ریکارڈ کیا گیا اور سب سے زیادہ 43.6 ڈگری سیلسیس دہری، روہتاس میں ریکارڈ کیا گیا۔ پورنیہ میں درجہ حرارت میں 4.3 ڈگری گراوٹ دیکھی گئی، جب کہ گیا میں 4.2 ڈگری گراوٹ ریکارڈ کی گئی۔ راجدھانی پٹنہ میں بھی 1.9 ڈگری گراوٹ درج کی گئی۔
کیرالہ میں مانسون پہنچ چکا ہے۔ بہار میں لوگ اس کی آمد کا بے صبری سے انتظار کر رہے ہیں۔ محکمہ موسمیات کے مطابق مانسون کے 12 اور 15 جون کے درمیان ریاست میں پہنچنے کا امکان ہے۔ حالانکہ اسے فعال ہونے میں دو سے تین دن لگیں گے۔ بہار بھر میں 17 سے 18 جون تک موسلا دھار بارش شروع ہوگی، جس سے گرمی سے خاصی راحت ملے گی۔
ہندوستھان سماچار
ہندوستان سماچار / Mohammad Afzal Hassan
