چھگن بھجبل کے نام پر سیاسی حلقوں میں بحث جاریپونے، 7 جون (ہ س)۔ راجیہ سبھا کی خالی نشست کے لیے امیدوار کے انتخاب کو پارٹی کا اندرونی معاملہ قرار دیتے ہوئے نائب وزیر اعلیٰ سنتیرا پوار نے کہا ہے کہ تمام متعلقہ افراد کی رائے حاصل کرنے کے بعد آئندہ دو دن کے اندر امیدوار کے نام کا اعلان کر دیا جائے گا۔ وہ بارامتی میں طوفانی بارش سے متاثرہ علاقوں کا دورہ کرنے کے بعد صحافیوں سے گفتگو کر رہی تھیں۔ اس موقع پر انہوں نے طوفان کے دوران جان گنوانے والی ایک معمر خاتون کے اہل خانہ سے ملاقات کرکے اظہارِ تعزیت بھی کیا۔سنتیرا پوار کے استعفے کے بعد خالی ہونے والی راجیہ سبھا نشست کے لیے سابق وزیر چھگن بھجبل کے نام کی سیاسی حلقوں میں چرچہ جاری ہے۔ اس بارے میں سوال کیے جانے پر انہوں نے کہا کہ امیدوار کا انتخاب پارٹی کی داخلی کارروائی کا حصہ ہے اور تمام پہلوؤں پر غور و خوض اور متعلقہ افراد کی آراء حاصل کرنے کے بعد دو دن کے اندر حتمی فیصلہ سامنے آ جائے گا۔دریں اثنا، بارامتی شہر اور اطراف کے علاقوں میں حالیہ طوفانی بارش کے باعث زراعت، مکانات اور دیگر املاک کو بڑے پیمانے پر نقصان پہنچا ہے۔ متاثرہ علاقوں کا جائزہ لینے کے بعد سنتیرا پوار نے کہا کہ بارامتی شہر میں وسیع پیمانے پر نقصان ہوا ہے اور تقریباً 400 بڑے درخت جڑ سے اکھڑ گئے ہیں۔ انہوں نے بتایا کہ دیہی علاقوں میں بھی فصلوں کو شدید نقصان پہنچا ہے، جبکہ کراتی، کاٹے پھل اور آس پاس کے دیہات میں کیلے اور انار کے باغات سب سے زیادہ متاثر ہوئے ہیں۔سنتیرا پوار نے مزید کہا کہ متاثرہ علاقوں کا براہِ راست معائنہ کیا گیا ہے اور ریاستی حکومت کسانوں کے ساتھ مضبوطی سے کھڑی ہے۔ انتظامیہ کو نقصانات کے فوری پنچنامے تیار کرنے کی ہدایت دی گئی ہے تاکہ متاثرہ کسانوں اور شہریوں کو جلد از جلد راحت فراہم کی جا سکے۔ انہوں نے یقین دلایا کہ حکومت متاثرین کی مدد کے لیے مثبت فیصلہ کرے گی۔ انہوں نے کہا کہ طوفانی بارش کے بعد انتظامیہ اور عوامی نمائندوں کی جانب سے امدادی سرگرمیوں میں تیزی لائی جا رہی ہے اور متاثرہ کسانوں و شہریوں تک فوری مدد پہنچانے کے لیے مسلسل کوششیں جاری ہیں۔

ہندوستھان سماچار

--------------------

ہندوستان سماچار / جاوید این اے