کولکاتا، 7 جون(ہ س)۔کولکاتا میونسپل کارپوریشن کے ایک اور کونسلر جوراسنکو کے وارڈ نمبر 39 کے محمد جسیم الدین کو پولیس نے اتوار کی صبح ان کے گھر سے گرفتار کیا۔ موصولہ اطلاعات کے مطابق پولیس اور مرکزی دستے اتوار کی صبح سے ان کے گھر کے باہر موجود تھے۔ الزام ہے کہ جسیم الدین نے دروازہ نہیں کھولا۔ تقریبا چھ گھنٹے انتظار کرنے کے بعد پولیس باہر سے تالا کھول کر گھر میں داخل ہوئی اور انہیں گرفتار کر لیا۔ واقعے کے بعد علاقے میں کشیدگی پائی جاتی ہے۔جب کہ ان کے حامیوں نے احتجاج کیا، بی جے پی کے حامیوں نے ان کے اوپر انڈوں سے حملہ بھی کیا۔پولیس نے جیسم الدین کے خلاف پاکسو ایکٹ اور انڈین پینل کوڈ (بی این ایس) کی مختلف دفعات کے تحت مقدمہ درج کیا ہے۔

مقامی ذرائع کے مطابق جسیم الدین کے قریبی لوگوں کا نام تین سال قبل علاقے کی ایک نابالغ لڑکی کے ساتھ مبینہ چھیڑ چھاڑ کے سلسلے میں سامنے آیا تھا۔ اب لڑکی کالج کی طالبہ ہے۔ الزام ہے کہ ہفتہ کو اسے دوبارہ ہراساں کیا گیا اور پرانا مقدمہ واپس لینے کی دھمکی دی گئی۔ اس کے بعد لڑکی کے گھر والوں نے پولیس میں شکایت درج کرائی۔ پولیس نے ہفتہ کی رات اس معاملے میں جسیم الدین کے قریبی شخص کو بھی گرفتار کیا۔ کونسلر سمیت کل پانچ افراد کے خلاف مقدمہ درج کیا گیا ہے۔ایف آئی آر کے الزامات غیر قانونی سرگرمیوں میں ملوث ہونے، مجرمانہ سازش، دھمکی دینے، متاثرہ کی شناخت ظاہر کرنے اور اس کی شائستگی کو ٹھیس پہنچانے سے متعلق ہیں۔

یاد رہے کہ اس سے ایک دن پہلے کولکاتا میونسپل کارپوریشن کے وارڈ نمبر 101 کے کونسلر بپادتیہ داس گپتا کو بھی مبینہ بھتہ خوری کے معاملے میں گرفتار کیا گیا تھا۔ اس سے قبل وہ بی جے پی میں تھے اور 2010 میں ترنمول کانگریس میں شامل ہوئے۔ انہوں نے ترنمول کونسلروں کے چیف وہپ کے طور پر بھی خدمات انجام دی ہیں۔ اب ان کی گرفتاری کے بعد محمد جسیم الدین کا نام بھی گرفتار کونسلروں کی فہرست میں شامل کر دیا گیا ہے۔

ہندوستھان سماچار

ہندوستان سماچار / Mohammad Khan