شملہ، 7 جون (ہ س)۔ جون کی گرمی نے اب ہماچل پردیش میں اپنا اثر دکھانا شروع کردیا ہے۔ اپنی تازہ ترین پیشین گوئی میں، محکمہ موسمیات نے ریاست کے تین اضلاع – اونا، بلاسپور اور سولن کے لیے 9 اور 10 جون کو گرمی کی لہر کے لیے ایلو الرٹ جاری کیا ہے۔ اس کے ساتھ ہی اس نے اشارہ دیا ہے کہ گرمی کا یہ دور زیادہ دیر نہیں چلے گا۔ 11 اور 12 جون کو ویسٹرن ڈسٹربنس کے اثر سے ریاست کے بیشتر حصوں میں موسم بدل سکتا ہے اور بارش، طوفان اور بجلی گرنے کی سرگرمیاں بڑھ سکتی ہیں۔

محکمہ موسمیات کے مطابق ریاست میں اگلے تین دنوں تک موسم بنیادی طور پر خشک رہے گا۔ صاف آسمان اور چمکدار دھوپ کی وجہ سے زیادہ سے زیادہ درجہ حرارت میں مسلسل اضافہ متوقع ہے۔ گزشتہ دو دنوں سے ریاست کے میدانی علاقوں میں گرمی کی شدت میں اضافہ ہوا ہے، کئی علاقوں میں دن کا درجہ حرارت 40 ڈگری سیلسیس کے قریب پہنچ گیا ہے۔ اتوار کو دارالحکومت شملہ سمیت بیشتر علاقوں میںدھوپ تیز رہی اور گرمی عام دنوں کی نسبت زیادہ شدت سے محسوس کی گئی۔

اونا، بلاس پور اور سولن میں گرمی کی لہر کے لیے ایلو الرٹ

اپنے تازہ ترین بلیٹن میں، محکمہ موسمیات نے 9 اور 10 جون کو اونا، بلاسپور اور سولن اضلاع میں گرمی کی لہر کی پیش گوئی کی ہے۔ اس کے نتیجے میں، ان اضلاع کے لیے ایلو الرٹ جاری کیا گیا ہے۔ محکمہ کا کہنا ہے کہ مسلسل خشک موسم اور بڑھتے ہوئے درجہ حرارت کی وجہ سے لوگوں کو گرمی سے متعلق مسائل کا سامنا کرنا پڑ سکتا ہے۔

اگرچہ ریاست کے دیگر حصوں میں بھی درجہ حرارت میں اضافے کی توقع ہے، تاہم ان تینوں اضلاع میں لوکے حالات پیدا ہونے کا زیادہ امکان ہے۔ ماہرین موسمیات نے لوگوں کو مشورہ دیا ہے کہ وہ دوپہر کو غیر ضروری باہرنکلنے سے گریز کریں، وافر مقدار میں پانی پیئیں اور بوڑھوں اور بچوں کا خاص خیال رکھیں۔

12 11-جون کو موسم تبدیل، 10 اضلاع میں طوفان اور بارش کا الرٹ جاری

گرمی کے اس دور کے بعد موسم میں تبدیلی کے آثار ہیں۔ محکمہ موسمیات کے مطابق 11 اور 12 جون کو ویسٹرن ڈسٹربنس کے فعال ہونے کی وجہ سے ریاست کے بیشتر حصوں میں موسم خراب رہ سکتا ہے۔ شملہ، منڈی، کلّو، چمبا، کانگڑہ، ہمیر پور، اونا، بلاس پور،سولن اور سرمورسمیت بقیہ 10 اضلاع میں گرج چمک، بارش اور آسمانی بجلی گرنے کے لیےایلو الرٹ جاری کیا گیا ہے۔

ان دو دنوں کے دوران کئی مقامات پر 30 سے 40 کلومیٹر فی گھنٹہ کی رفتار سے تیز ہوائیں چلنے کا امکان ہے۔ بعض علاقوں میں گرج چمک کے ساتھ ہلکی سے درمیانی بارش کا بھی امکان ہے۔ محکمہ کا اندازہ ہے کہ 13 جون تک موسم معمول پر آسکتا ہے۔

اتوار کی صبح 8.30 بجے تک ریکارڈ کیے گئے کم سے کم درجہ حرارت کے اعداد و شمار میں پاونٹا صاحب سب سے زیادہ گرم رہا، جہاں کم سے کم درجہ حرارت 26 ڈگری سیلسیس ریکارڈ کیا گیا۔

ریاست میں گزشتہ 24 گھنٹوں کے دوران صرف چھٹپٹ بارش ریکارڈ کی گئی۔ کانگڑا میں 1.2 ملی میٹر اور برٹھی میں 1.0 ملی میٹر بارش ریکارڈ کی گئی۔

---------------

ہندوستان سماچار / عبدالسلام صدیقی