لاتور، اکولہ، گڈچرولی اور جلگاؤں میں اموات ریکارڈ ، محکمہ صحت کی شہریوں کو احتیاط برتنے کی اپیلپونے، 7 جون (ہ س)۔ ریاست میں بڑھتی ہوئی گرمی کے پس منظر میں یکم مارچ سے 5 جون کے دوران لو لگنے (ہیٹ اسٹروک) کے مجموعی طور پر 292 مریض درج کیے گئے ہیں۔ محکمہ صحت کے مطابق جمعہ کے روز لو لگنے کے دو نئے مریض سامنے آئے، جبکہ کسی نئی موت کی اطلاع موصول نہیں ہوئی۔ محکمہ صحت کے اعداد و شمار کے مطابق لو لگنے سے اموات کے شبہ میں مجموعی طور پر 15 واقعات درج کیے گئے ہیں۔ ان میں سے 6 اموات کی باضابطہ طور پر تصدیق کی جا چکی ہے کہ وہ لو لگنے کے باعث ہوئیں، جبکہ باقی معاملات کی جانچ جاری ہے۔لو لگنے سے ہونے والی اموات میں ضلع لاتور میں ایک، ضلع اکولہ میں دو، ضلع گڈچرولی میں ایک اور ضلع جلگاؤں میں دو اموات شامل ہیں، اس طرح مجموعی طور پر 6 اموات ریکارڈ کی گئی ہیں۔ دریں اثنا، ریاست کے مختلف علاقوں میں درجہ حرارت مسلسل بلند سطح پر پہنچنے کے باعث محکمہ صحت نے شہریوں سے خصوصی احتیاط برتنے کی اپیل کی ہے۔ محکمہ نے مشورہ دیا ہے کہ دوپہر کے وقت شدید دھوپ میں بلا ضرورت باہر نکلنے سے گریز کیا جائے، وافر مقدار میں پانی پیا جائے، ہلکے اور ڈھیلے کپڑے استعمال کیے جائیں اور جسم میں پانی کی کمی نہ ہونے دی جائے۔محکمہ صحت نے یہ بھی کہا ہے کہ اگر کسی شخص کو چکر آنا، شدید کمزوری محسوس ہونا، سخت سر درد، جسمانی درجہ حرارت میں غیر معمولی اضافہ یا دیگر پریشان کن علامات ظاہر ہوں تو فوری طور پر طبی مشورہ حاصل کیا جائے۔ ریاست میں بڑھتے ہوئے درجہ حرارت کے پیش نظر محکمہ صحت کی تمام مشینری چوکس ہے، جبکہ شہریوں سے بھی اپیل کی گئی ہے کہ وہ لو لگنے سے بچاؤ کے لیے ضروری احتیاطی تدابیر اختیار کریں۔

ہندوستھان سماچار

--------------------

ہندوستان سماچار / جاوید این اے