جے پور، 7 جون (ہ س)۔ راجستھان میں موسم کا مزاج لگاتار بدل رہا ہے۔ ایک طرف کئی اضلاع میں آندھی اور بارش سے لوگوں کو شدید گرمی اور امس سے راحت ملی ہے، وہیں مغربی راجستھان کے کئی علاقوں میں تیز گرمی کا سلسلہ جاری ہے۔ محکمہ موسمیات نے اتوار کو 12 اضلاع میں آندھی اور بارش کا یلو الرٹ جاری کیا ہے۔ اس کے علاوہ 8 جون کو 7 اضلاع میں بارش اور 2 اضلاع میں ہیٹ ویو (لو) کی وارننگ دی گئی ہے۔

ہفتے کو ریاست کے کئی حصوں میں پری مانسون سرگرمیاں دیکھنے کو ملیں۔ بیکانیر ضلع میں تیز آندھی کے ساتھ بارش ہوئی اور کچھ علاقوں میں ژالہ باری بھی ہوئی۔ شری ڈونگر گڑھ علاقے میں تیز ہوا کی وجہ سے ایک ویئر ہاوس کا ٹن شیڈ اڑ کر تقریباً آدھا کلومیٹر دور کھیت میں جا گرا۔ ٹونک ضلع میں شام کے وقت تیز ہوا کے ساتھ بارش ہوئی، جس سے موسم خوشگوار ہو گیا۔

محکمہ موسمیات کے مطابق بیکانیر، چورو، ہنومان گڑھ، سیکر، جھنجھنو، جے پور، دوسا، الور، ٹونک اور سوائی مادھوپور سمیت کئی اضلاع میں ہفتے کو موسم نے کروٹ لی۔ کئی مقامات پر تیز ہوائیں چلیں اور بارش ہوئی۔ ریاست میں ہفتے کو سب سے زیادہ بارش ٹونک ضلع کے نوائی علاقے میں ہوئی، جہاں 65 ملی میٹر سے زیادہ بارش ریکارڈ کی گئی۔ اس کے علاوہ الور میں 22 ملی میٹر اور بیکانیر میں 14.6 ملی میٹر بارش ماپی گئی۔ بارش کے بعد ان علاقوں میں درجہ حرارت میں گراوٹ آ گئی اور لوگوں کو راحت ملی۔

دوسری طرف باڑمیر، جیسلمیر، جودھپور اور شری گنگا نگر سمیت مغربی راجستھان کے اضلاع میں گرمی کا قہر جاری رہا۔ دن کے وقت تیز دھوپ اور گرم ہواؤں کی وجہ سے لوگوں کو پریشانی کا سامنا کرنا پڑا۔ محکمہ موسمیات نے ان علاقوں میں اگلے دو دنوں تک درجہ حرارت بڑھنے اور گرمی کا اثر برقرار رہنے کا امکان ظاہر کیا ہے۔

محکمہ موسمیات کے مطابق آنے والے دو دنوں تک ریاست میں موسم کی یہی ملی جلی صورتحال بنی رہ سکتی ہے۔ مشرقی راجستھان کے کئی اضلاع میں آندھی اور ہلکی سے درمیانی بارش کی سرگرمیاں جاری رہنے کا امکان ہے، جبکہ مغربی راجستھان کے کچھ حصوں میں ہیٹ ویو اور تیز گرمی کا اثر دیکھنے کو مل سکتا ہے۔۔

ہندوستھان سماچار

---------------

ہندوستان سماچار / انظر حسن