ہلدوانی، 6 جون (ہ س)۔ رام پور روڈ پر واقع ایک ایمیزون اسٹور میں جمعہ کی دیر رات ہولناک آگ لگنے سے دو ملازمین کی دردناک موت ہو گئی۔ آگ اتنی تیزی سے پھیلی کہ کچھ ہی دیر میں پورے اسٹور کو اپنی زد میں لے لیا۔ فائر بریگیڈ اور پولیس کی ٹیموں نے کئی گھنٹوں کی مشقت کے بعد آگ پر قابو پایا۔

موصولہ معلومات کے مطابق، رام پور روڈ کے جیت پور نیگی علاقے میں واقع ایمیزون اسٹور میں جمعہ کی رات تقریباً 11.30 بجے اچانک آگ بھڑک اٹھی۔ پاس ہی واقع بلنکٹ اسٹور کے ملازمین نے دھواں اور آگ کے شعلے دیکھ کر فوری طور پر فائر بریگیڈ کو اطلاع دی۔ اطلاع ملتے ہی ایس پی سٹی منوج کتیال اور ہلدوانی کے انچارج انسپکٹر وجے مہتا فورس کے ساتھ موقع پر پہنچ گئے۔

فائر فائٹرز شٹر توڑ کر اسٹور کے اندر داخل ہوئے اور آگ بجھانے کی مہم شروع کی۔ حالانکہ تب تک آگ پورے اسٹور میں پھیل چکی تھی اور زیادہ تر سامان جل کر تباہ ہو گیا تھا۔ راحت اور بچاو کے کام کے دوران اندر سو رہے دو ملازمین کی لاشیں برآمد کی گئیں۔ ابتدائی جانچ میں ان کی موت آگ کی زد میں آنے اور دم گھٹنے کی وجہ سے ہونے کا خدشہ ظاہر کیا جا رہا ہے۔

متوفیان کی شناخت گولا پار کے رہنے والے نریندر (35، اصل ساکن سومیشور، الموڑہ) اور پنچایت گھر علاقے کے رہنے والے امت (25) کے طور پر ہوئی ہے۔ پولیس نے اہل خانہ کی موجودگی میں لاشوں کی شناخت کرا کر انہیں پوسٹ مارٹم کے لیے سشیلا تیواری اسپتال بھیج دیا۔

آتشزدگی کے اس واقعے میں اسٹور میں رکھا لاکھوں روپے کا سامان جل کر راکھ ہو گیا۔ اس کے علاوہ چارجنگ پر لگی ایک اسکوٹی اور احاطے میں کھڑا ایک ٹیمپو بھی آگ کی زد میں آ کر پوری طرح تباہ ہو گیا۔

ایس پی سٹی منوج کتیال نے بتایا کہ اطلاع ملتے ہی فائر بریگیڈ کی ٹیم کو موقع پر بھیجا گیا تھا۔ آگ پر قابو پا لیا گیا ہے، لیکن دو ملازمین کو بچایا نہیں جا سکا۔ آگ لگنے کی وجوہات کا ابھی پتہ نہیں چل سکا ہے۔ پولیس اور محکمہ فائر بریگیڈ معاملے کی جانچ کر رہے ہیں۔

ہندوستھان سماچار

---------------

ہندوستان سماچار / انظر حسن