نینی تال، 30 جون (ہ س)۔ نینی تال شہر میں گزشتہ چار دنوں کے اندر نینی جھیل سے تیسری لاش ملنے کا واقعہ سامنے آیا ہے۔ مسلسل پیش آنے والے ایسے واقعات سے شہر کے باشندوں، سیاحوں اور انتظامیہ کی تشویش بڑھ گئی ہے۔ منگل کی صبح پاشان دیوی مندر علاقے کے قریب جھیل میں ایک نوجوان کی لاش تیرتی ہوئی ملی۔ پولیس نے لاش کو باہر نکال کر اس کی شناخت ملی تال سات نمبر علاقے کے رہائشی 31 سالہ پرکاش چندر آریہ کے طور پر کی ہے۔

موصولہ اطلاعات کے مطابق پرکاش چندر آریہ ملی تال واقع ایک ہوٹل میں کام کرتے تھے۔ پیر کی رات وہ ایک دوست سے ملنے کی بات کہہ کر گھر سے نکلے تھے، لیکن واپس نہیں لوٹے۔ اگلے دن کام پر نہ پہنچنے پر ہوٹل انتظامیہ نے اس کی اطلاع اہلِ خانہ کو دی۔ تلاش کے دوران پاشان دیوی مندر کے قریب جھیل کے کنارے ان کا بیگ، کپڑے، جوتے اور دودھ کی بوتل ملی، جس کے بعد اہلِ خانہ نے پولیس میں گمشدگی کی رپورٹ درج کرائی۔

منگل کی صبح سیر کے لیے نکلے لوگوں نے جھیل میں ایک لاش تیرتی ہوئی دیکھی اور اس کی اطلاع پولیس کو دی۔

اطلاع ملنے پر پولیس موقع پر پہنچی اور مقامی کشتی بانوں کی مدد سے لاش کو جھیل سے باہر نکالا۔ اہلِ خانہ نے لاش کی شناخت پرکاش چندر آریہ کے طور پر کی۔ پولیس نے لاش کو قبضے میں لے کر پوسٹ مارٹم کے لیے بھیج دیا ہے۔ پولیس کے مطابق موت کی اصل وجہ کا پتہ پوسٹ مارٹم رپورٹ اور دیگر شواہد کی بنیاد پر لگایا جائے گا۔ معاملے کی تحقیقات جاری ہے۔

ہندوستھان سماچار

---------------

ہندوستان سماچار / عبدالواحد