سی بی آئی نے عدالت سے وائس سیمپل اور لیپ ٹاپ کا پاس ورڈ مانگا

بھوپال، 30 جون (ہ س)۔ مدھیہ پردیش کی معروف اداکارہ اور ماڈل ٹویشا شرما کی مشکوک موت کے معاملے میں ملزمہ ساس، ریٹائرڈ جج گری بالا سنگھ اور شوہر ایڈوکیٹ سارتھک سنگھ کی عدالتی حراست 14 جولائی تک بڑھا دی گئی ہے۔ سی بی آئی نے ڈیجیٹل شواہد جمع کرنے کے لیے عدالت سے ملزمان کے وائس سیمپل (آواز کے نمونے) لینے اور ضبط شدہ لیپ ٹاپ کا پاس ورڈ دلانے کی اجازت مانگی ہے۔

راجدھانی بھوپال کی عدالت میں منگل کو ویڈیو کانفرنسنگ کے ذریعے ہوئی پیشی کے دوران سی بی آئی نے جانچ کو آگے بڑھانے کے لیے دو اہم درخواستیں عدالت کے سامنے رکھیں۔ ٹویشا کے وکیل شبھانگ دیکشت نے بتایا کہ جانچ ایجنسی سارتھک کا لیپ ٹاپ پہلے ہی ضبط کر چکی ہے، لیکن وہ پاس ورڈ کی وجہ سے لاک ہے۔ ڈیجیٹل شواہد کو کھنگالنے اور فورینسک جانچ کو پورا کرنے کے لیے سی بی آئی نے عدالت سے پاس ورڈ فراہم کرانے کا مطالبہ کیا ہے۔ اس کے ساتھ ہی سی بی آئی نے معاملے سے منسلک آڈیو شواہد کے ملاپ کے لیے دونوں ملزمان کے وائس سیمپل لینے کی بھی اجازت مانگی ہے۔ ان دونوں درخواستوں پر اب آنے والی 03 جولائی کو کورٹ میں سماعت ہوگی، جس پر عدالت نے ملزم فریق سے اپنا جواب داخل کرنے کو کہا ہے۔

سماعت کے دوران دفاعی وکیل نے دلیل دی کہ ریٹائرڈ جج گری بالا سنگھ کے گھر پر حال ہی میں چوری کی واردات ہوئی ہے، اس لیے انہیں متعلقہ تھانہ علاقے میں لے جا کر یہ تصدیق کرائی جائے کہ وہاں سے کیا کیا سامان چوری ہوا ہے۔ اس مطالبے پر سخت رخ اپناتے ہوئے سی بی آئی نے صاف الفاظ میں اعتراض ظاہر کیا اور کہا کہ چوری کا واقعہ اور ٹویشا کی موت دو بالکل الگ الگ معاملے ہیں، لہٰذا اس کیس کی سماعت میں ایسی کسی مانگ پر غور نہیں کیا جا سکتا۔ عدالت نے بھی سی بی آئی کے اعتراض سے اتفاق کرتے ہوئے کہا کہ ملزم فریق کو اگر ایسی کوئی مانگ کرنی ہے تو وہ باقاعدہ تحریری درخواست پیش کریں، محض زبانی گزارش کی بنیاد پر کوئی حکم جاری نہیں کیا جائے گا۔ اس کے بعد عدالت نے دفاعی فریق کی مخالفت کو درکنار کرتے ہوئے دونوں ملزمان کا ریمانڈ 14 جولائی تک بڑھا دیا۔

اس پورے واقعے کے درمیان یہ بات بھی سامنے آئی ہے کہ گزشتہ 28-27 جون کی درمیانی رات ریٹائرڈ جج گری بالا سنگھ کے سنسان گھر میں نامعلوم چوروں نے دھاوا بولا تھا۔ بدمعاشوں نے وہاں رکھے سونے کے زیورات اور گری بالا نیز ان کے بیٹے سارتھک سنگھ سے جڑے کچھ ضروری قانونی دستاویزات کی فائل چرانے کی کوشش کی تھی۔ واردات کے وقت گھر میں موجود گری بالا کے بڑے بیٹے نے بتایا کہ چور مکان کے پچھلے حصے سے داخل ہوئے تھے، اس لیے انہیں اس کی بھنک نہیں لگی۔ تاہم، اسی دوران علاقے میں گشت کر رہی پولیس کی گاڑی کا سائرن سن کر بدمعاش گھبرا گئے اور چوری کا سامان موقع پر ہی چھوڑ کر بھاگ نکلے۔ پولیس نے مستعدی دکھاتے ہوئے علاقے کی سی سی ٹی وی فوٹیج کھنگالی اور مشتبہ سرگرمیوں کی بنیاد پر دو لوگوں کو حراست میں لے کر پوچھ گچھ شروع کر دی ہے۔

ہندوستھان سماچار

---------------

ہندوستان سماچار / انظر حسن