ممبئی، 30 جون (ہ س) مہاراشٹر کے نائب وزیر اعلیٰ ایکناتھ شندے نے منگل کو کہا کہ شیو سینا یو بی ٹی کی قیادت کو اس بات پر اپنا احتساب کرنا چاہیے کہ ان کی پارٹی کے رہنما دوسری جماعتوں میں کیوں شامل ہو رہے ہیں۔ انہوں نے کہا کہ اس پر غور کرنے کے بجائے پارٹی کے رہنما مسلسل بے بنیاد بیانات دے رہے ہیں۔

ایکناتھ شندے ودھان بھون میں سچن اہیر کی جانب سے قانون ساز کونسل کے ڈپٹی چیئرمین کے عہدے کے لیے نامزدگی داخل کرنے کے بعد صحافیوں سے گفتگو کر رہے تھے۔ انہوں نے کہا کہ صرف آٹھ روز قبل شیو سینا یو بی ٹی کے چھ ارکان پارلیمنٹ ان کی قیادت والی شیو سینا میں شامل ہوئے تھے۔ اس کے بعد یو بی ٹی کے رہنماؤں نے ان چھ لوک سبھا حلقوں میں جا کر نئے شامل ہونے والے ارکان کے خلاف سخت بیانات دیے۔ شندے نے دعویٰ کیا کہ انہی بیانات کا جواب آج سچن اہیر نے دیا اور انہوں نے شیو سینا یو بی ٹی کا ساتھ چھوڑ دیا۔

نائب وزیر اعلیٰ نے کہا کہ قانون ساز کونسل کے ڈپٹی چیئرمین کے عہدے کے لیے سچن اہیر کے نام کا باضابطہ اعلان بدھ کو کیا جائے گا۔ انہوں نے کہا کہ اہیر پوری مہاراشٹر کی خدمت کریں گے۔ شندے کے مطابق ان کی ترجیح صرف عوامی مسائل کا حل ہے، اسی وجہ سے مختلف لوگ ان کے ساتھ جڑ رہے ہیں، اور آئندہ بھی وہ اسی سمت میں کام جاری رکھیں گے۔

اس موقع پر سچن اہیر نے کہا کہ انہوں نے اپنے حلقے کے عوام کے مسائل حل نہ ہونے کے باعث ایکناتھ شندے کا ساتھ دینے کا فیصلہ کیا۔ انہوں نے کہا کہ ماضی میں انہیں جو بھی ذمہ داریاں سونپی گئیں، انہوں نے انہیں پوری ذمہ داری سے نبھایا، اور آئندہ بھی نائب وزیر اعلیٰ جو ذمہ داری دیں گے، اسے پوری دیانت داری کے ساتھ انجام دینے کی کوشش کریں گے۔

ہندوستھان سماچار

--------------------

ہندوستان سماچار / جاوید این اے