نئی دہلی، 30 جون (ہ س): شمال مشرقی ضلع کی اینٹی آٹو تھیفٹ اسکواڈ (اے اے ٹی ایس) نے دہلی پولیس کا فرضی کانسٹیبل بن کر گھومنے والے ایک نوجوان کو گرفتار کر لیا ہے۔ ملزم دہلی سول ڈیفنس کا والنٹیئر ہے اور ایس ڈی ایم دفتر، نند نگری میں تعینات تھا۔ اس کے قبضے سے دہلی پولیس کے کانسٹیبل کی وردی بھی برآمد ہوئی ہے۔

پولیس کے مطابق 28 جون کی رات تقریباً 9:40 بجے اے اے ٹی ایس کی گشتی ٹیم کو اطلاع ملی کہ ایک شخص کرول نگر تھانہ علاقے کے جواہر نگر پکٹ کے قریب دہلی پولیس کی وردی پہن کر خود کو پولیس اہلکار ظاہر کر رہا ہے۔ اطلاع ملتے ہی پولیس ٹیم نے موقع پر چھاپہ مار کر رات تقریباً 9:50 بجے ملزم کو گرفتار کر لیا۔ پوچھ گچھ کے دوران اس نے اپنا نام کانسٹیبل شاہ رخ خان بتایا اور دعویٰ کیا کہ اس کی تعیناتی کراول نگر تھانے میں ہے۔ تاہم پولیس نے جب تھانے سے اس کی تصدیق کرائی تو معلوم ہوا کہ اس نام کا کوئی بھی پولیس اہلکار وہاں تعینات نہیں ہے، جس کے بعد اس کا بھانڈا پھوٹ گیا۔

گرفتار ملزم کی شناخت 26 سالہ شاہ رخ خان کے طور پر ہوئی ہے۔ وہ گاؤں منڈولا، لونی، غازی آباد (اتر پردیش) کا رہنے والا ہے۔ تفتیش میں انکشاف ہوا کہ وہ دہلی سول ڈیفنس کا والنٹیئر ہے اور ایس ڈی ایم دفتر، نند نگری میں خدمات انجام دے رہا تھا۔ پولیس نے ملزم کے خلاف کراول نگر تھانے میں ایف آئی آر نمبر 171/2026 کے تحت بھارتیہ نیائے سنہتا (بی این ایس) کی دفعات 204 اور 205 کے تحت مقدمہ درج کر لیا ہے۔ اس کے قبضے سے دہلی پولیس کے کانسٹیبل کی وردی بھی برآمد ہوئی ہے۔

پوچھ گچھ کے دوران ملزم نے اعتراف کیا کہ وہ دہلی پولیس کے کانسٹیبل کے طور پر خود کو لوگوں کے سامنے پیش کر رہا تھا۔ پولیس اس بات کی تحقیقات کر رہی ہے کہ اس نے فرضی شناخت کا استعمال کن کن مقامات پر کیا اور اس کا مقصد کیا تھا۔ معاملے کی مزید تفتیش جاری ہے۔

ہندوستھان سماچار

---------------

ہندوستان سماچار / عبدالواحد