لاس اینجلس، 26 جون (ہ س)۔ فیفا ورلڈ کپ 2026 کے گروپ ڈی کے ایک رسمی مقابلے میں جمعہ کوترکیہ نے اضافی وقت میں فیصلہ کن گول کی بدولت شریک میزبان امریکہ کو 2-3 سے شکست دی۔ پہلے ہی گروپ فاتح بن کر آخری 32 میں اپنی جگہ یقینی بنا چکا امریکہ اپنی مسلسل تیسری جیت کی تلاش میں تھا،جبکہ پہلے ہی ٹورنامنٹ سے باہر ہو چکا ترکیہ اپنی عزت بچانے کے ارادے سے میدان میں اترا۔

امریکہ نے مقابلے میں شاندار آغاز کیا۔ آسٹن ٹرسٹی نے تیسرے منٹ میں گول کر کے ٹیم کو 0-1 کی برتری دلا دی۔ یہ ورلڈ کپ میں امریکہ کا دوسرا تیز ترین گول بھی تھا۔

تاہم، ترکیہ نے جلد ہی جوابی حملہ کیا۔ اسٹار کھلاڑی اردا گلر نے 10ویں منٹ میں شاندار فنشنگ کے ساتھ ورلڈ کپ میں اپنا پہلا گول کر کے اسکور 1-1 کر دیا۔

اس کے بعد 31ویں منٹ میں باریس الپر یلماز نے ایرن ایلمالی کے شاندار موو پر گول کرکے ترکیہ کو 1-2 کی برتری دلا دی۔ دوسرے ہاف کے شروع میں امریکہ نے برابری حاصل کرلی۔ 49ویں منٹ میں سیباسٹین برہالٹر نے طاقتور شاٹ لگا کر اسکور2-2 سے برابر کر دیا۔

اس کے بعد امریکی اسٹار کرسچن پلیسِک کو میدان پر اتارا گیا جنہوں نے واپسی کے بعد کئی اچھے حملے کیے لیکن گول کرنے میں ناکام رہے۔ اس دوران ترکیہ نے مسلسل دباو¿ ڈالا۔

جب میچ برابری کی طرف بڑھ رہا تھا تو کان ایہان نے اضافی وقت میں قریب سے شاندار گول کر کے ترکیہ کو 2-3 کی یادگار جیت دلا دی۔

شکست کے باوجود امریکہ نے گروپ ڈی میں سرفہرست رہ کر پہلے ہی آخری 32 میں جگہ بنا لی ہے اور اگلے ہفتے اس کا مقابلہ بوسنیا اور ہرزیگوینا سے ہوگا۔ اس دوران ترکیہ ٹورنامنٹ سے باہر ہونے کے باوجود جیت کے ساتھ اپنی مہم ختم کرنے میں کامیاب رہا۔

ہندوستھان سماچار

ہندوستان سماچار / محمد شہزاد