ڈی ایم اویناش کمار کی بڑی کارروائی، جی ایس ٹی ہڑپنے کے الزام میں جی ڈی کنسٹرکشن بلیک لسٹ، ایف آئی آر درج کرنے کے احکامات

علی گڑھ، 25 جون (ہ س)۔ ضلع مجسٹریٹ اویناش کمار نے پنچایت فنڈ میں مالی بے ضابطگی اور سرکاری خزانے کو نقصان پہنچانے کے معاملے میں بڑی کارروائی کرتے ہوئے ترقیاتی بلاک بجولی کی گرام پنچایت لہرا سالم پور میں کام کرنے والی جی ڈی کنسٹرکشن فرم کو بلیک لسٹ کرنے اور اس کے خلاف ایف آئی آر درج کرانے کے احکامات جاری کیے ہیں۔

مشترکہ جانچ رپورٹ کے مطابق فرم کو مالی سال 2023-24، 2024-25 اور 2025-26 کے دوران جی ایس ٹی اور سی جی ایس ٹی مد میں مجموعی طور پر 4 لاکھ 39 ہزار 816 روپے 68 پیسے ادا کیے گئے تھے، لیکن فرم نے نہ تو وقت پر جی ایس ٹی ریٹرن داخل کیا اور نہ ہی ٹیکس کی رقم جمع کرائی۔

چیف ڈیولپمنٹ آفیسر یوگیندر کمار نے بتایا کہ اس معاملے کی تفصیلی جانچ میں جی ڈی کنسٹرکشن کو مکمل طور پر قصوروار پایا گیا۔ انہوں نے کہا کہ پنچایت فنڈ عوام کی محنت کی کمائی ہے اور اس کے غلط استعمال یا مالی بے ضابطگی کو کسی صورت برداشت نہیں کیا جائے گا۔

ضلع پنچایت راج افسر یتیندر کمار نے بتایا کہ ضلع مجسٹریٹ کے احکامات پر فرم کو بلیک لسٹ کرنے کی کارروائی شروع کر دی گئی ہے، جبکہ گرام پنچایت کے سکریٹری کے ذریعے تھانہ دادوں میں متعلقہ دفعات کے تحت ایف آئی آر درج کرانے کی ہدایت بھی دی گئی ہے۔ اس کے علاوہ ریاستی ٹیکس محکمہ کو بھی ضروری کارروائی کے لیے خط ارسال کیا جا رہا ہے۔ انتظامیہ نے واضح کیا ہے کہ سرکاری فنڈ کے غلط استعمال کے معاملات میں زیرو ٹالرنس پالیسی کے تحت سخت کارروائی جاری رہے گی۔

ہندوستھان سماچار

-------------

ہندوستان سماچار / سید کامران علی گڑھ