مدھیہ پردیش کے 14 اضلاع میں منایا جائے گا ’زیرو شیڈو ڈے‘ کا جشن، دن کا دورانیہ سال کا سب سے لمبا اور رات ہوگی سب سے چھوٹی

بھوپال، 20 جون (ہ س)۔

علمِ فلکیات (ایسٹرونومی) میں دلچسپی رکھنے والے لوگوں کے لیے اتوار، 21 جون کا دن خاص ہونے جا رہا ہے۔ اس دن سورج اپنا اترائن سفر (شمالی سفر) مکمل کرنے جا رہا ہے۔ چھ ماہ قبل 21 دسمبر سے شروع ہوا یہ سفر اتوار کی دوپہر 1 بجکر 57 منٹ پر ختم ہوگا۔ اس دوران کچھ لمحات کے لیے آپ کا سایہ غائب ہو جائے گا۔

مدھیہ پردیش کی نیشنل ایوارڈ یافتہ سائنس پروموٹر ساریکا گھارو نے ہفتہ کے روز اس فلکیاتی واقعے کی معلومات دیتے ہوئے بتایا کہ خطِ سرطان (ٹراپک آف کینسر) پر واقع مقامات میں مقامی دوپہر کے وقت سورج بالکل سر کے اوپر ہوگا، جس سے ان مقامات پر کچھ لمحات کے لیے سیدھے کھڑے شخص یا کسی کھمبے کا سایہ غائب ہو جائے گا۔ اس واقعے کو ’زیرو شیڈو ڈے‘ کہا جاتا ہے۔

انہوں نے بتایا کہ یہ فلکیاتی معجزہ پوری ریاست میں نہیں ہوگا، بلکہ صرف خطِ سرطان کے دائرے میں آنے والے مقامات تک ہی محدود رہے گا۔ اس دن مدھیہ پردیش کے 14 اضلاع کے خطِ سرطان پر واقع شہروں اور مقامات پر یہ واقعہ پیش آئے گا۔

ساریکا نے بتایا کہ 21 جون کا یہ دن اس لیے بھی خاص ہے کیونکہ یہ اس سال کا سب سے لمبے دورانیے کا دن اور سب سے چھوٹی رات ہوگی۔ اس دن سورج شمالی نصف کرہ (نوردرن ہیمیسفیئر) میں اپنی آخری حد پر ہوگا، جسے سائنسی زبان میں ’سمر سالسٹس‘ (انقلابِ صیفی) کہا جاتا ہے۔

ساریکا نے خطِ سرطان کے آس پاس رہنے والے عام لوگوں اور بچوں سے اپیل کی ہے کہ وہ آج اس فلکیاتی جشن کو ضرور منائیں۔ انہوں نے بتایا کہ اسے دیکھنے کے لیے کسی آلے کی ضرورت نہیں ہے۔ اپنے ضلع کے مقررہ وقت سے کچھ دیر پہلے کھلی دھوپ والی جگہ یا چھت پر جائیں۔ وہاں ایک پی وی سی پائپ، پانی کی بوتل یا لکڑی کے ڈنڈے کو ہموار زمین پر سیدھا کھڑا کریں یا خود سیدھے کھڑے ہو جائیں۔ ٹھیک سولر نون (حقیقی نصف النہار) کے وقت وہ چیز اور آپ کا اپنا سایہ آپ کے پیروں کے نیچے سمٹ کر پوری طرح چھپ جائے گا۔ تو آئیے، مل کر سورج کے اترائن سفر کے مکمل ہونے کے اس سائنسی تہوار کے لائیو گواہ بنیں۔

مدھیہ پردیش کے ان 14 اضلاع کے مقامات پر غائب ہوگا سایہ:

ضلع کا نام - مقامی سولر نون کا وقت

شہڈول - دوپہر 12 بجکر 06 منٹ

امریا - دوپہر 12 بجکر 09 منٹ

کٹنی - دوپہر 12 بجکر 10 منٹ

جبل پور - دوپہر 12 بجکر 12 منٹ

دموہ - دوپہر 12 بجکر 12 منٹ

ساگر - دوپہر 12 بجکر 16 منٹ

رائسین - دوپہر 12 بجکر 20 منٹ

ودیشا - دوپہر 12 بجکر 20 منٹ

بھوپال - دوپہر 12 بجکر 22 منٹ

سیہور - دوپہر 12 بجکر 23 منٹ

راج گڑھ - دوپہر 12 بجکر 25 منٹ

آگر مالوا - دوپہر 12 بجکر 27 منٹ

اجین - دوپہر 12 بجکر 28 منٹ

رتلام - دوپہر 12 بجکر 31 منٹ

ہندوستھان سماچار

ہندوستان سماچار / انظر حسن