پولیس نے اسے دہلی ایئرپورٹ سے گرفتار کیا اور پوچھ گچھ کے لیے پنجاب لایا

چنڈی گڑھ، 19 جون (ہ س)۔ پنجاب پولیس نے ملائیشیا سے مطلوب خالصتان زندہ باد فورس (کے زیڈ ایف) کے دوگرگوں کی حوالگی کو حاصل کر لیا ہے۔ پنجاب پولیس نے ان دونوں افراد کو نئی دہلی کے اندرا گاندھی بین الاقوامی ہوائی اڈے سے گرفتار کیا اور مزید تفتیش کے لیے پنجاب لاکر ان سے فی الحال ریمانڈ پر پوچھ گچھ کی جا رہی ہے۔

پنجاب کے ڈائرکٹر جنرل آف پولیس (ڈی جی پی) گورو یادو نے جمعہ کو کہا کہ امبالا کے رہنے والے گرویندر سنگھ اور پٹیالہ کے رہنے والے منجیت سنگھ ملائیشیا میں مقیم کے زیڈ ایف کے حمایت یافتہ دہشت گرد ماڈیول کے گرگے ہیں جو اہم ریلوے انفراسٹرکچر کو نشانہ بنانے میں ملوث ہیں۔ یہ کارروائی اس سال 23 جنوری کو سرہند ریلوے لائن پر آئی ای ڈی دھماکے اور 27 اپریل کو پٹیالہ کے شمبھو میں اسی ریلوے لائن پر دھماکے کی کوشش کے سلسلے میں چار بنیاد پرستوں کی گرفتاری کے بعد کی گئی ہے۔

پنجاب پولیس نے ان واقعات کے ذمہ دار دہشت گرد ماڈیول کا بھانڈا پھوڑ دیا۔ تحقیقات کے دوران، پولیس ٹیموں نے ایک راکٹ پروپیلڈ گرینیڈ (آر پی جی) لانچر، 2.296 کلوگرام وزنی دھاتی آئی ای ڈی، ڈیٹونیٹر اور بیٹریاں، 1.456 کلوگرام وزنی آر ڈی ایکس کے دو پیکٹ، دو ہینڈ گرنیڈ، چھ جدید پستول اور میگزین اور کارتوس برآمد کیے۔ ڈی جی پی گورو یادو نے کہا کہ اس بین الاقوامی سازش کی تحقیقات میں ملائیشیا سے کام کرنے والے کے زیڈ ایف ہینڈلرز اور مالی مدد کرنے والوں کے ملوث ہونے کا انکشاف ہوا ہے۔

انہوں نے کہا کہ ملک بدر کیے گئے ملزمان پنجاب میں کے زیڈ ایف کے گرگوں کو آف شور اکاونٹس کے ذریعے دہشت گردی کی رقوم کی منتقلی اور ریاست میں امن و امان کو خراب کرنے کے لیے دہشت گردانہ حملوں کی منصوبہ بندی اور ان کو انجام دینے میں اہم کردار ادا کرتے تھے۔ انہوں نے کہا کہ دونوں ملزمان کو جمعرات کو پٹیالہ کی ایک مجاز عدالت میں پیش کیا گیا اور مزید پوچھ گچھ کے لیے انہیں پولیس کی تحویل میں بھیج دیا گیا۔ انہوں نے کہا کہ وسیع تر نیٹ ورک کو بے نقاب کرنے اور سازش میں ملوث تمام افراد کی شناخت کے لیے تحقیقات جاری ہیں۔

---------------

ہندوستان سماچار / عبدالسلام صدیقی