بھوپال، 19 جون (ہ س)۔ مدھیہ پردیش کے دورے پر آئیں صدر جمہوریہ دروپدی مرمو جمعہ کے روز مغربی بنگال کے کلائی کنڈ ایئرپورٹ کے لیے روانہ ہوئیں۔ آج دوپہر بعد اندور کے دیوی اہلیہ بائی ہولکر انٹرنیشنل ایئرپورٹ پر گورنر منگو بھائی پٹیل اور وزیر اعلیٰ ڈاکٹر موہن یادو سمیت عوامی نمائندوں، فوجی حکام اور سینئر انتظامی افسران نے انہیں جذباتی وداعی دی۔

صدر جمہوریہ مرمو جمعہ کی صبح ضلع کھنڈوا کے اومکاریشور میں عالمی سکل سیل ڈے پر منعقدہ پروگرام میں حصہ لینے کے بعد دوپہر میں اندور ایئرپورٹ پہنچیں اور یہاں سے اپنے سفر کی پہلی منزل مکمل کر کے آگے کے طے شدہ پروگراموں کے لیے روانہ ہو گئیں۔

اندور ضلع انتظامیہ کے مطابق، صدر جمہوریہ مرمو اندور سے مغربی بنگال کے کلائی کنڈ ایئرپورٹ کے لیے روانہ ہوئیں۔ صدر جمہوریہ اپنے مدھیہ پردیش کے پانچ روزہ دورے کے دوسرے پڑاو میں ہفتہ، 20 جون کو شام 6.10 بجے طیارے کے ذریعے جبل پور ایئرپورٹ آئیں گی۔ یہاں سے وہ سرکٹ ہاوس کے لیے روانہ ہوں گی۔ وہ رات کو آرام جبل پور کے سرکٹ ہاوس میں ہی کریں گی۔ صدر جمہوریہ اگلے دن 21 جون کو صبح 7.20 بجے جبل پور میں منعقد ہونے والے عالمی یومِ یوگا کے پروگرام میں شرکت کریں گی۔ اس پروگرام کے بعد صدر جمہوریہ دوپہر 11.40 بجے رانی درگاوتی یونیورسٹی، جبل پور کی 36ویں کانووکیشن تقریب میں بطور مہمانِ خصوصی شرکت کریں گی۔

اس کے بعد وہ دوپہر 1.20 بجے جبل پور ایئرپورٹ سے گوالیار کے لیے روانہ ہوں گی۔ وہ دوپہر 2.20 بجے گوالیار پہنچیں گی۔ یہاں سے وہ ہیلی کاپٹر کے ذریعے کونو نیشنل پارک کے لیے روانہ ہوں گی۔ وہ دوپہر 3.35 بجے کونو گیسٹ ہاوس پہنچیں گی۔ صدر جمہوریہ شب بسری کونو گیسٹ ہاوس میں کریں گی۔ وہ اگلے دن 22 جون کو صبح 6.30 بجے کونو نیشنل پارک کا دورہ کریں گی۔

صدر جمہوریہ صبح 10.20 بجے کونو نیشنل پارک ہیلی پیڈ سے روانہ ہو کر صبح 11.05 بجے گوالیار ایئرپورٹ پہنچیں گی اور گوالیار ایئرپورٹ سے صبح 11.15 بجے وہ دہلی کے لیے روانہ ہوں گی۔ صدر جمہوریہ کے پانچ روزہ دورے کو لے کر انتظامیہ مستعد ہے اور سیکورٹی کے پختہ انتظامات کیے گئے ہیں۔ تمام پروگرام کے مقامات پر ہائی سیکورٹی اور نو فلائنگ زون قرار دیا گیا ہے۔

اندور ایئرپورٹ پر گورنر پٹیل اور وزیر اعلیٰ ڈاکٹر یادو کے ساتھ شہری ترقی اور ہاوسنگ کے وزیر کیلاش وجئے ورگیہ، آبی وسائل کے وزیر تلسی رام سلاوٹ، رکنِ پارلیمنٹ شنکر لالوانی، اراکین اسمبلی مہیندر ہارڈیا، رمیش میندولا اور مالینی گوڑ، میئر پشیامتر ببھارگو نے انہیں الوداع کہا۔

اس موقع پر کمانڈنٹ لیفٹیننٹ جنرل وجئے بی نائر، ڈویژنل کمشنر ڈاکٹر سودام کھاڈے، پولیس کمشنر سنتوش سنگھ سمیت عوامی نمائندے اور سینئر افسران موجود تھے۔

ہندوستھان سماچار

---------------

ہندوستان سماچار / انظر حسن