نئی دہلی، 19 جون (ہ س)۔ ملک میں جاری پیپر لیک اور تعلیمی نظام کی مبینہ بدانتظامی کے بارے میں، نیشنل اسٹوڈنٹس یونین آف انڈیا (این ایس یو آئی) کے انچارج کنہیا کمار نے جمعہ کو کہا کہ وہ اس لڑائی کو پارلیمنٹ سے سڑکوں پر لے جائیں گے، پیپر لیک کو روکیں گے اور تعلیم کو تجارت کے بجائے ملک کے شہریوں کا بنیادی حق بنانے پر اصرار کریں گے۔ دہلی میں کانگریس ہیڈکوارٹر میں منعقدہ ایک پریس کانفرنس کے دوران کنہیا کمار نے قومی اہلیت کم داخلہ ٹیسٹ (این ای ای ٹی) اور دیگر مسابقتی امتحانات میں بے ضابطگیوں پر وزیر اعظم اور وزیر تعلیم پر سخت حملہ کیا۔ انہوں نے مطالبہ کیا کہ وزیر تعلیم فوری طور پر مستعفی ہوں اور نیشنل ٹیسٹنگ ایجنسی (این ٹی اے) پر مکمل پابندی عائد کی جائے۔ انہوں نے ملک کے تعلیمی نظام پر سوال اٹھاتے ہوئے کہا کہ البرٹ آئن اسٹائن کو اڈیشہ کے نصاب میں پائلٹ کے طور پر بیان کیا گیا ہے۔وہیں، راجستھان میں ایک امتحان کے دوران، طلباءکو سوالیہ پرچوں کے بجائے جوابی پرچے دیے گئے۔ این ایس یو آئی لیڈر نے کہا، ہمارے سامنے ایسی ہزاروں غلطیاں ہو رہی ہیں، ملک کے شہریوں کو ان پڑھ اور بے روزگار چھوڑ کر 'وکست بھارت' کا خواب کیسے پورا ہو سکتا ہے؟ کنہیا کمار نے ملک میں طلباءکی ذہنی حالت پر گہری تشویش کا اظہار کیا۔ رپورٹس کا حوالہ دیتے ہوئے انہوں نے کہا کہ پیپر لیک ہونے اور غیر یقینی صورتحال کی وجہ سے طلبہ ڈپریشن کا شکار ہیں۔ انہوں نے الزام لگایا کہ وزراءکے بچے بیرون ملک پڑھتے ہیں اس لیے انہیں عام طلباءکی حالت زار سے کوئی سروکار نہیں۔ کوٹہ اور تعلیمی نظام پر پارلیمنٹ میں قائد حزب اختلاف راہول گاندھی کی طرف سے دی گئی پیشکش کا حوالہ دیتے ہوئے کانگریس نے کہا کہ حکومت اس سنگین مسئلہ کو بھی ”وائٹ واش“ کرنے میں لگی ہوئی ہے۔ سرکاری نظام اور یو پی ایس سی جیسے اداروں میں ’لیٹرل انٹری‘ متعارف کروا کر محنت سے افسر بننے کا خواب نوجوانوں سے چھین لیا جا رہا ہے۔ ملک میں تعلیم کو اب بنیادی حق کی بجائے کاروبار میں تبدیل کر دیا گیا ہے، جہاں ”چند ادو اور دھنداکرو“ کی پالیسی رائج ہے۔ کنہیا نے ملک بھر کے طلباء اور نوجوانوں پر زور دیا کہ وہ کوئی خودکشی یا سخت قدم نہ اٹھائیں۔ انہوں نے طلباءکو تسلی دیتے ہوئے کہا کہ یہ آپ کی یا آپ کے والدین کی غلطی نہیں ہے۔ آپ ناکام نہیں ہوئے، یہ نظام ناکام ہوا ہے۔

---------------

ہندوستان سماچار / عبدالسلام صدیقی