نئی دہلی، 19 جون (ہ س)۔ دہلی ہائی کورٹ نے 21 جون کو ہونے والے این ای ای ٹی کے دوبارہ امتحان کے پیش نظر سوشل میڈیا میسجنگ ایپ ٹیلیگرام کو عارضی طور پر بلاک کرنے کے حکم کو چیلنج کرنے والی ایک عرضی کو خارج کر دیا۔ جسٹس تیجس کریا کی سربراہی والی بنچ نے کہا کہ حکومت نے قانون کی پیروی کی ہے۔

ہائی کورٹ نے کہا کہ حکومت نے آئی ٹی ایکٹ کے سیکشن 69 اے کی تعمیل کی ہے۔ عدالت نے ٹیلی گرام کی اس دلیل کو بھی مسترد کر دیا کہ اسرکارنے عارضی ناکہ بندی کی وجوہات فراہم نہیں کیں۔ ہائی کورٹ نے کہا کہ مرکزی حکومت کا حکم درست ہے۔ عدالت نے 18 جون کو فیصلہ محفوظ کیا تھا۔

سماعت کے دوران مرکزی حکومت نے ٹیلی گرام کو نیا ڈارک ویب قرار دیا، ایک ایسا پلیٹ فارم جس کے ذریعے غیر قانونی سرگرمیاں اور غیر قانونی کارروائیاں کی جاتی ہیں۔ سالیسٹر جنرل تشار مہتا نے مرکزی حکومت کی نمائندگی کرتے ہوئے دلیل دی کہ یہ مجرموں کو اپنی غیر قانونی سرگرمیاں انجام دینے کے قابل بناتا ہے اور یہ کہ تفتیشی ایجنسیوں کے لیے اس پرجرائم کرنے والوں کو پکڑنا انتہائی مشکل ہے۔

مرکزی حکومت کے حلف نامہ میں کہا گیا ہے کہ این ای ای ٹی امتحان کے دوران ٹیلی گرام کا بڑے پیمانے پر استعمال کیا گیا تھا، جس کی وجہ سے امتحان کو منسوخ کر دیا گیا ۔ انہوں نے بتایا کہ الیکٹرانکس اور آئی ٹی کی وزارت نے آئی ٹی ایکٹ کے سیکشن 69 اے کے تحت صرف 22 جون تک ٹیلی گرام ایپ کو بلاک کرنے کا حکم جاری کیا تھا۔ دوسرے آرڈر میں لازمی قرار دیا گیا کہ ٹیلیگرام 30 جون تک ایڈیٹنگ فیچر کو غیر فعال کر دے۔ مرکزی حکومت نے کہا کہ یہ حکم 21 جون کو ہونے والے این ای ای ٹی کے دوبارہ امتحان کے دوران شفافیت کو یقینی بنانے کے لیے ضروری ہے۔

سماعت کے دوران مرکزی حکومت کی جانب سے اٹارنی جنرل آر وینکٹ رمانی بھی پیش ہوئے۔ اٹارنی جنرل نے کہا کہ مرکزی حکومت کا حکم اپنے آپ میں مکمل ہے۔ انہوں نے سوال کیا کہ ہمارے جیسے ملک میں اگر احتیاطی تدابیر نہ کی جائیں تو ہم کہاں جائیں؟ اٹارنی جنرل نے کہا کہ منافع کے لیے بنائے گئے پلیٹ فارم تناسب کے اصول کا حوالہ نہیں دے سکتے۔ انہوں نے کہا کہ مرکزی حکومت نے کسی دوسرے پلیٹ فارم کو ہاتھ نہیں لگایا۔ وہ زیادہ طاقتور ہیں، لیکن ان کا اپنا فلٹریشن سسٹم ہے۔

ٹیلی گرام نے کہا تھا کہ اسے آئی ٹی رولز کے رول 9 کے تحت ہنگامی حالات میں استعمال کیا جا سکتا ہے۔ مرکزی حکومت نے دفعہ 69A کا اطلاق کیا جو کہ غیر قانونی ہے۔ مرکزی حکومت کے حکم میں نیشنل ٹیسٹنگ ایجنسی (این ٹی اے) کے خلاف شکایت کا حوالہ دیا گیا ہے۔ ٹیلی گرام نے کہا کہ متعلقہ اہلکار کسی بھی شکایت کا جائزہ لیتے ہیں اور اپنی سفارشات دیتے ہیں۔ متعلقہ حکام کا دعویٰ ہے کہ انہوں نے چینل کو بلاک کرنے کی سفارش نہیں کی۔ مرکزی حکومت کے حکم میں متعلقہ حکام اور وزارت کے درمیان بات چیت کا کوئی ذکر نہیں ہے اور نہ ہی ٹیلی گرام کی کارروائی کا۔

ٹیلی گرام نے اپنی درخواست میں کہا تھا کہ اس کے 15 کروڑ صارفین ہیں۔ مرکزی حکومت کے اس فیصلے سے اس کے صارفین کو کافی پریشانی ہو سکتی ہے۔ قابل ذکر ہے کہ این ای ای ٹی امتحان کے پیپر لیک کے معاملے میں ٹیلی گرام ایپ کے استعمال کا انکشاف ہوا تھا۔ اس کے بعد الیکٹرانکس اور انفارمیشن ٹیکنالوجی کی وزارت نے اس ایپ کو 22 جون تک عارضی طور پر بند کرنے کا حکم جاری کیا۔ وزارت کے ایک اور حکم میں کہا گیا ہے کہ ٹیلی گرام ایپ کسی بھی پیغام کو ایڈٹ کرنے کے فیچر کو 30 جون تک غیر فعال کر دے، ٹیلی گرام نے وزارت کے ان احکامات کو ہائی کورٹ میں چیلنج کیا تھا۔

---------------

ہندوستان سماچار / عبدالسلام صدیقی