کرناٹک قانون ساز کونسل انتخابات کی ووٹنگ مکمل، ووٹوں کی گنتی شروع

بنگلورو، 18 جون (ہ س)۔ کرناٹک ریاست کی قانون ساز کونسل کی سات نشستوں کے لیے ہونے والے انتخابات میں آج ووٹنگ پرامن طریقے سے مکمل ہو گئی۔ اب سب کی نظریں انتخابی نتائج پر ٹکی ہوئی ہیں۔ ووٹنگ کے بعد ووٹوں کی گنتی شروع ہو گئی ہے۔ دراصل، ریاست کی قانون ساز کونسل کے سات ارکان کی مدتِ کار 30 جون کو ختم ہو رہی ہے۔ ان نشستوں کے لیے ودھان سودھا میں صبح 9 بجے سے شام 4 بجے تک ووٹنگ ہوئی، جس میں تمام سیاسی جماعتوں کے ارکانِ اسمبلی نے اپنے حقِ رائے دہی کا استعمال کیا۔

وزیر اعلیٰ ڈی کے شیوکمار، سابق وزیر اعلیٰ سدارامیا، حزبِ اختلاف کے رہنما آر اشوک اور جنتا دل (سیکولر) کے پارلیمانی لیڈر سی بی سوریش بابو سمیت کئی اہم رہنماوں نے ووٹنگ میں حصہ لیا۔ ووٹنگ کے دوران رہنماوں نے اپنی اپنی پارٹیوں کی جیت کا یقین ظاہر کیا۔ ریاست کی قانون ساز کونسل کی سات نشستوں کے لیے برسرِاقتدار کانگریس نے پانچ امیدوار میدان میں اتارے ہیں، جبکہ بھارتیہ جنتا پارٹی نے دو امیدواروں کو موقع دیا ہے۔

جنتا دل (سیکولر) نے بھی اپنا ایک امیدوار اتارا ہے، جس کی وجہ سے آخری نشست کے لیے سخت مقابلہ دیکھنے کو مل رہا ہے۔ کانگریس اپنی عددی طاقت کی بنیاد پر پانچوں نشستیں جیتنے کا دعویٰ کر رہی ہے، جبکہ بی جے پی کو دو نشستیں ملنے کی امید ہے۔ ساتویں نشست کے لیے کانگریس اور بی جے پی-جے ڈی (ایس) کے حمایت یافتہ امیدواروں کے درمیان کانٹے کا مقابلہ دیکھا جا رہا ہے۔ ووٹنگ کا عمل پورا ہونے کے بعد ووٹوں کی گنتی شروع ہو گئی ہے اور رات تک انتخابی نتائج آنے کا امکان ہے۔

ہندوستھان سماچار

---------------

ہندوستان سماچار / انظر حسن