نئی دہلی، 3 مئی (ہ س)۔صحت اور خاندانی بہبود کی مرکزی وزارت نے اتوار کو راشٹریہ بال سواستھیہ کاریہ کرم (آر بی ایس کے) 2.0 کے لئے نئی اور نظر ثانی شدہ رہنما خطوط جاری کیں جس میں عوامی صحت خدمات کی فراہمی میں بہترین طرز عمل کو یقینی بنایا گیا ہے۔یہ اقدام ملک میں بچوں کی صحت اور مجموعی نشوونما کو مضبوط بنانے کی جانب ایک اہم قدم ہے۔

وزارت نے کہا کہ اس پروگرام کا بنیادی مقصد پہلے سے موجود 4-ڈی ماڈل کو مزید مضبوط کرنا ہے۔ یہ ماڈل چار اہم زمروں پر توجہ مرکوز کرے گا: پیدائشی نقائص، بیماریاں، کمزوری، غذائیت کی کمی اور نشونمامیں تاخیر۔

نئی ہدایات میں جدید دور کے صحت کے چیلنجوں کو بھی شامل کیا گیا ہے، جن میں غیر متعدی بیماریاں، دماغی صحت کے مسائل اور طرز عمل کی خرابیاں شامل ہیں۔ یہ پروگرام اب صحت کے روایتی مسائل کے ساتھ ساتھ بدلتے ہوئے طرز زندگی سے متعلق چیلنجوں کو بھی حل کرے گا۔

نظرثانی شدہ فریم ورک میں بچوں کے لیے احتیاطی، پروموشنل اور علاج کی خدمات کی ایک جامع رینج شامل ہے۔ یہ پروگرام پیدائش سے لے کر 18 سال تک کے بچوں کا احاطہ کرتا ہے اور لائف سائیکل پر مبنی طریقہ کار کو زیادہ موثر بناتا ہے۔

وزارت نے واضح کیا کہ ان رہنما خطوط کو کامیابی سے نافذ کرنے کے لیے محکمہ تعلیم اور خواتین اور بچوں کی ترقی وزارت صحت کے ساتھ مل کر کام کریں گے۔ مزید برآں، اسکولوں اور آنگن واڑی مراکز کو اسکریننگ اور بیداری کے لیے کلیدی مراکز کے طور پر تیار کیا جائے گا۔

---------------

ہندوستان سماچار / عبدالسلام صدیقی