بانسواڑا، 2 مئی ( ہ س )— سائبر پولیس نے آن لائن فراڈ اور مشکوک بینکنگ نیٹ ورک کے خلاف بڑی کامیابی حاصل کی ہے۔ ڈی جی سائبر کرائم کے حکم پر یکم اپریل سے 30 اپریل تک چلائے گئے خاص “آپریشن میول ہنٹر” کے دوران پولیس نے چار افراد کو گرفتار کیا۔ اس معاملہ کا مرکز “ہرش ٹریڈنگ” نام کا ایک بینک اکاؤنٹ تھا، جس نے ملک بھر میں پھیلے فراڈ نیٹ ورک کا پردہ فاش کیا۔ سائبر تھانے کے انچارج ہری اوم مینا کی قیادت میں تحقیقات کے دوران حیران کن باتیں سامنے آئیں۔

پولیس کو معلوم ہوا کہ یہ اکاؤنٹ ہرش جوشی کے نام پر کھولا گیا تھا، لیکن اسے دھوکہ دہی کی رقم رکھنے اور خرد برد کے لیے استعمال کیا جا رہا تھا۔ اس ایک اکاؤنٹ کے خلاف گجرات، مہاراشٹر اور تلنگانہ جیسے مختلف ریاستوں سے کل 21 شکایات درج ہوئیں، جن میں تقریباً 16 لاکھ 40 ہزار روپے کی ٹھگی کی تصدیق ہوئی ہے۔

مزید جانچ میں پتا چلا کہ یہ صرف شروعات تھی۔ اکاؤنٹ کے دیگر مشکوک لین دین کو شامل کرنے پر کل رقم 82 لاکھ روپے سے زیادہ نکلی۔ اس میں سے تقریباً 65 لاکھ 70 ہزار روپے کے لین دین پر ابھی ایف آئی آر درج ہونا باقی ہے۔

گرفتار ملزمان میں ہرش جوشی، ہمانشو شرما، وکاس وجے ورگیہ اور انیل باتھم شامل ہیں۔ پولیس پوچھ گچھ میں یہ بات سامنے آئی کہ اکاؤنٹ اگرچہ ہرش کے نام پر تھا، لیکن اسے اصل میں گینگ کے دوسرے افراد چلا رہے تھے۔ دھوکہ دہی کی رقم پہلے اسی اکاؤنٹ میں آتی تھی، پھر اسے مختلف طریقوں سے نکال لیا جاتا تھا۔ فی الحال پولیس اس بین ریاستی نیٹ ورک کی مزید گہرائی سے تحقیقات کر رہی ہے تاکہ اصل سرغنہ اور دیگر ساتھیوں تک پہنچا جا سکے۔

ہندوستھان سماچار

---------------

ہندوستان سماچار / عبدالواحد