نوی ممبئی ، 7 اپریل (ہ س)۔ نوی ممبئی کے ایروولی علاقے میں واقع سائناتھ واڑی کی چھترپتی چال میں نامعلوم افراد کی فائرنگ سے دو نوجوان زخمی ہو گئے، جبکہ حملہ آور موقع سے فرار ہونے میں کامیاب ہو گئے، پولیس نے معاملے کی تحقیقات شروع کر دی ہے۔
پولیس کے مطابق یہ واقعہ گزشتہ رات پیش آیا جب سندیپ گواس اور امیت موریا چال کے باہر کھڑے تھے کہ اسی دوران موٹر سائیکل پر سوار نامعلوم افراد وہاں پہنچے اور دونوں پر فائرنگ کر کے فرار ہو گئے۔ واقعے کی اطلاع ملتے ہی رابالے پولیس اسٹیشن کی ٹیم فوری طور پر جائے وقوعہ پر پہنچی اور زخمیوں کو علاج کے لیے اندراوتی اسپتال میں داخل کرایا گیا۔
پولیس نے بتایا کہ زخمی امیت موریا کی حالت صبح کے وقت بگڑ گئی، جس کے بعد اسے مزید علاج کے لیے ملنڈ کے فورٹس اسپتال منتقل کیا گیا، جبکہ دوسرے زخمی کا علاج جاری ہے۔ سینئر پولیس انسپکٹر بھالکرشنا ساونت کے مطابق ملزمان کی تلاش کے لیے علاقے کے سی سی ٹی وی فوٹیج کا جائزہ لیا جا رہا ہے اور جلد ہی انہیں گرفتار کرنے کی کوشش کی جا رہی ہے۔ پولیس نے واقعے کے پس منظر اور حملہ آوروں کی شناخت کے لیے مزید تفتیش شروع کر دی ہے۔
ہندوستھان سماچار
--------------------
ہندوستان سماچار / جاوید این اے
