نئی دہلی، 30 اپریل (ہ س)۔ دہلی کے دوارکا میں آج صبح تین بچے اس وقت ڈوب گئے جب سیکٹر-24 کے گولف کورس کمپلیکس کے اندر واقع تالاب میں نہانے کے لیے داخل ہوئے۔ شبہ ہے کہ بچے تالاب میں بہت گہرے اترے اور بعد میں ڈوب گئے۔ تینوں کی لاشیں تالاب سے نکال لی گئی ہیں۔ پولیس فی الحال مقامی باشندوں کی مدد سے بچوں کی شناخت کرنے کی کوشش کر رہی ہے۔
پولیس کے مطابق، صبح تقریباً 7:07 بجے سیکٹر-23 دوارکا پولس اسٹیشن میں پی سی آر کال موصول ہوئی، جس میں بتایا گیا کہ سیکٹر-24 گولف کورس کے تالاب میں تین بچے ڈوب گئے ہیں۔ اس اطلاع پر کارروائی کرتے ہوئے اسٹیشن ہاو¿س آفیسر (ایس ایچ او) ایک ٹیم کے ساتھ جائے وقوعہ پر پہنچے۔ فائر ڈیپارٹمنٹ اور دیگر متعلقہ اداروں کو مدد کے لیے طلب کیا گیا۔ مختصر ریسکیو آپریشن کے بعد تینوں بچوں کی لاشیں تالاب سے نکال لی گئیں۔
پولیس حکام کا کہنا ہے کہ بچوں کی عمریں 8 سے 10 سال کے درمیان تھیں۔ ان کے کپڑے تالاب کے کنارے پڑے پائے گئے۔ شبہ ہے کہ وہ تالاب میں نہانے کی نیت سے داخل ہوئے تھے۔ پولیس نے اشارہ دیا ہے کہ ابتدائی تحقیقات کی بنیاد پر واقعہ ایک حادثہ معلوم ہوتا ہے۔ ان بچوں کے بارے میں کسی بھی مقامی پولیس اسٹیشن میں گمشدگی کی رپورٹ درج نہیں کروائی گئی۔ اس وقت آس پاس کے علاقے کی سی سی ٹی وی فوٹیج کا جائزہ لیا جا رہا ہے۔
واقعے سے علاقے میں کہرام مچ گیا ہے۔ مقامی رہائشیوں نے مطالبہ کیا ہے کہ کھلے پانی کے ذخائر اور تالابوں کے گرد حفاظتی اقدامات کو مزید مضبوط کیا جائے تاکہ مستقبل میں ایسے سانحات رونما ہونے سے بچ سکیں۔ دوارکا ضلع کے ڈپٹی کمشنر آف پولیس (ڈی سی پی) کشل پال سنگھ کے مطابق، معاملے کی تحقیقات جاری ہے، اور بچوں کی شناخت کے بعد ان کے اہل خانہ کو مطلع کیا جائے گا۔
---------------
ہندوستان سماچار / عبدالسلام صدیقی
