جموں میونسپل کارپوریشن نے پانی کی نکاسی کے لیے اقدامات شروع کیے

جموں، 28 اپریل (ہ س)۔ جموں میونسپل کارپوریشن (جے ایم سی) نے شہر کے آبی نالوں اور پانی کی نکاسی کے نظام میں آلودگی پر قابو پانے کے لیے اقدامات شروع کر دیے ہیں۔ یہ کارروائی کمشنر دیونش یادو کی ہدایت پر عمل میں لائی جا رہی ہے، جس کے تحت مختلف مقامات پر فلوٹنگ ٹریش بوم بیریئرز نصب کیے جا رہے ہیں۔

حکام کے مطابق کمشنر دیونش یادو نے شہریوں کو ہدایت دی ہے کہ وہ کوڑا کرکٹ، پلاسٹک فضلہ اور تعمیراتی ملبہ نالوں، نہروں اور دیگر آبی ذخائر میں نہ پھینکیں، کیونکہ اس سے نکاسیٔ آب کا نظام متاثر ہوتا ہے اور خاص طور پر برسات کے دوران پانی جمع ہونے کے مسائل پیدا ہوتے ہیں۔ انہوں نے عوام سے اپیل کی کہ وہ صفائی کو برقرار رکھنے میں میونسپل کارپوریشن کے ساتھ تعاون کریں اور ذمہ داری کا مظاہرہ کریں۔ ان کا کہنا تھا کہ آبی گزرگاہوں کی صفائی عوامی صحت اور ماحولیاتی توازن کے لیے نہایت ضروری ہے۔

جے ایم سی نے نشاندہی شدہ مقامات پر فلوٹنگ ٹریش بوم بیریئرز کی تنصیب کا عمل شروع کر دیا ہے تاکہ پانی میں تیرتے کچرے کو روک کر اسے آگے پھیلنے سے بچایا جا سکے۔ یہ منصوبہ فی الحال ابتدائی مرحلے میں ہے اور اس کی کامیابی کے بعد مزید علاقوں تک اس کا دائرہ بڑھایا جائے گا۔ کمشنر نے ہدایت دی ہے کہ آئندہ مراحل میں ان بیریئرز کو دریائے توی تک بھی توسیع دی جائے گی تاکہ بڑے آبی ذخائر میں آلودگی کو کنٹرول کیا جا سکے۔ انہوں نے عوام سے اس مہم میں بھرپور تعاون کی اپیل بھی کی۔

ہندوستھان سماچار

---------------

ہندوستان سماچار / محمد اصغر