نوجوانوں اور اداروں کی سماجی خدمات کا اعتراف، یکم مئی کو ممبئی میں دیا جائے گا ضلع یوتھ ایوارڈ

ممبئی ، 28 اپریل (ہ س)۔ ممبئی میں سماج کے لیے نمایاں خدمات انجام دینے والے نوجوانوں اور اداروں کی حوصلہ افزائی کے مقصد سے “ضلع یوتھ ایوارڈ” پیش کیا جائے گا۔ یہ ایوارڈ اس سال یکم مئی، یومِ مہاراشٹر کے موقع پر دیا جائے گا۔ اس بات کی اطلاع ایڈیشنل ضلع کلکٹر باپوساہیب تھورات نے دی۔ اس سلسلے میں ضلع سطحی یوتھ ایوارڈ کمیٹی کی میٹنگ حال ہی میں ضلع کلکٹر دفتر ممبئی میں منعقد ہوئی، جس میں کمیٹی کے صدر کے طور پر باپوساہیب تھورات موجود تھے۔ اس موقع پر کمیٹی کے دیگر اراکین بھی شریک ہوئے۔

باپو صاحب تھوراٹ نے بتایا کہ ممبئی شہر ضلع کے نوجوانوں اور سماجی اداروں کی جانب سے دیہی اور شہری علاقوں میں کیے گئے مختلف عوامی مفاد کے کاموں کو اس ایوارڈ کے لیے مدنظر رکھا جاتا ہے۔ ان میں معاشرے کے کمزور طبقات کے لیے خدمات، درج فہرست ذاتوں اور قبائل کے علاقوں میں سرگرمیاں، جھونپڑی بستیوں اور شہری علاقوں کی بہتری، نشہ مخالف مہمات، آفات سے نمٹنے کے اقدامات، روزگار کی فراہمی، سائنس و ٹیکنالوجی، خواتین کو بااختیار بنانے اور ماحولیات کے تحفظ جیسے شعبے شامل ہیں۔

اس کے علاوہ قومی یکجہتی، ثقافتی اور کھیلوں کے میدان میں خدمات اور نوجوانوں کی ہمہ جہتی ترقی کے لیے کیے گئے اقدامات کو بھی اس ایوارڈ کے ذریعے سراہا جائے گا۔ انہوں نے یقین ظاہر کیا کہ اس اقدام سے دیگر نوجوانوں کو بھی تحریک ملے گی اور وہ سماجی خدمات میں بڑھ چڑھ کر حصہ لیں گے۔ ایوارڈ کے تحت اعزازی سند اور یادگاری نشان دیا جائے گا، جبکہ منتخب نوجوانوں کو فی کس 10 ہزار روپے اور سماجی اداروں کو 50 ہزار روپے کا انعام دیا جائے گا۔

ہندوستھان سماچار

--------------------

ہندوستان سماچار / جاوید این اے