آسنسول، 27 اپریل (ہ س)۔مغربی بنگال میں انتخابی ماحول کے درمیان سیاسی تشدد کے واقعات سامنے آرہے ہیں۔ مشرقی بردوان ضلع کے پورب استھلی کے نصرت پور علاقے میں بی جے پی کی ریلی کے بعد کشیدگی پھیل گئی۔

بی جے پی کے پورب استھلی جنوب حلقہ کے امیدوار کے انتخابی ایجنٹ سدیپت رائے نے دعویٰ کیا کہ پیر کو کالنا کے دھاتری گرام سے پورب استھلی-1 بلاک کے ہیمیت پور تک ایک ریلی نکالی جارہی تھی۔ الزام ہے کہ نصرت پور میں ترنمول کانگریس پارٹی کے دفتر سے ہتھیاروں سے حملہ کیا گیا، جس میں بی جے پی کے کئی کارکنان اور حامی زخمی ہوئے۔

ترنمول کانگریس کے پورب استھلی-1 بلاک صدر نے ان الزامات کی تردید کرتے ہوئے دعویٰ کیا کہ بی جے پی کی ریلی کے لوگ ان کے پارٹی دفتر میں داخل ہوگئے اور ان پر حملہ کردیا۔ اس واقعہ میں بلاک کے ایگزیکٹیو سکریٹری سمیت دو افراد شدید زخمی ہوگئے۔ صورتحال پر قابو پانے کے لیے پولیس اور مرکزی فورسز جائے وقوعہ پر پہنچ گئی ہیں۔

دریں اثنا، اتوار کی رات ہاوڑہ کے سنکریل میں ترنمول کانگریس اور سی پی آئی (ایم) کے حامیوں کے درمیان تصادم میں کل سات افراد زخمی ہوئے۔ اس واقعہ میں ترنمول کے ایک حامی کو مبینہ طور پر سر میں چوٹ لگی ہے۔

ترنمول کے حامیوں نے اتوار کی رات اس واقعہ کے خلاف احتجاج کرتے ہوئے مانک پور-چامپتلہ روڈ کو تقریباً ایک گھنٹے تک جام کر دیا۔ دونوں فریقوں نے ایک دوسرے پر حملے کا الزام لگایا ہے۔ واقعہ کی اطلاع ملتے ہی تھانہ سنکریل کی پولیس جائے وقوعہ پر پہنچی اور رات بھر کئی لوگوں سے پوچھ گچھ شروع کردی۔

پورے علاقے میں کشیدگی کا ماحول ہے اور پولیس صورتحال پر نظر رکھے ہوئے ہے۔

ہندوستھان سماچار

--------------

ہندوستان سماچار / محمد شہزاد