نئی دہلی، 27 اپریل (ہ س)۔ دہلی ہائی کورٹ نے گینگسٹر لارنس بشنوئی پر مبنی دستاویزی فلم ’لارنس آف پنجاب‘ کی ریلیز پر روک لگانے کی درخواست کے جواب میں کہا کہ اس کے پروڈیوسرز اسے اس وقت تک ریلیز نہیں کرسکتے جب تک کہ مرکزی حکومت کے حکم کو منسوخ نہیں کیا جاتا۔ اس لیے درخواست نمٹا دی جاتی ہے۔ جسٹس پروشندر کور کی سربراہی والی بنچ نے یہ فیصلہ سنایا۔ او ٹی ٹی پلیٹ فارم زی5 کی نمائندگی کرتے ہوئے راجیو نیر نے ہائی کورٹ میں کہا کہ مرکزی حکومت کے دستاویزی فلم کی ریلیز کو روکنے کے حکم کو چیلنج کیا جائے گا۔ زی5 کے مطابق، دستاویزی فلم لارنس بشنوئی کی کہانی بیان کرتی ہے، جو ایک طالب علم سے سیاست دان ہوا جس نے بعد میں ایک گینگ تشکیل دیا۔ پنجاب کانگریس کے صدر امریندر سنگھ راجہ وارنگ نے پنجاب اور ہریانہ ہائی کورٹ میں دستاویزی فلم کی ریلیز پر روک لگانے کی درخواست دائر کی تھی۔ مرکزی وزارت اطلاعات و نشریات نے پنجاب اور ہریانہ ہائی کورٹ میں کہا کہ پنجاب پولیس نے دستاویزی فلم کی ریلیز پر اعتراض کیا تھا، جس کے بعد مرکزی حکومت نے اس کی ریلیز کو روکنے کا حکم جاری کیا۔

ہندوستھان سماچار

ہندوستان سماچار / Mohammad Khan