نئی دہلی، 27 اپریل (ہ س)۔

شمالی ضلع کے بھلسوا ڈیری تھانے کے علاقے میں اتوار کی رات ایک المناک سڑک حادثے میں موٹر سائیکل پر سوار دو نوجوانوں کی موت ہو گئی۔ حادثہ وزیرآباد جانے والی لوپ روڈ پر مجلس پارک میٹرو اسٹیشن کے قریب پیش آیا۔ پولیس فوری طور پر جائے وقوعہ پر پہنچی تاہم اس وقت تک راہگیر دونوں زخمیوں کو اسپتال لے جا چکے تھے جہاں ڈاکٹروں نے انہیں مردہ قرار دے دیا۔

پولیس کے مطابق اتوار کی رات نو بجے کے قریب اطلاع ملی کہ رنگ روڈ سے وزیر آباد جانے والی لوپ روڈ پر سفید رنگ کی موٹر سائیکل کو حادثہ پیش آیا ہے۔ پولیس ٹیم جائے وقوعہ پر پہنچی اور موٹرسائیکل کو نالے کے قریب لاوارث پایا۔ تحقیقات کے دوران معلوم ہوا کہ راہگیروں نے موٹر سائیکل پر سوار دونوں نوجوانوں کو تشویشناک حالت میں بابو جگجیون رام اسپتال لے گئے تھے۔ پہنچنے پر ڈاکٹروں نے انہیں مردہ قرار دے دیا۔ مرنے والوں کی شناخت آصف علی (20) ساکن سنگم وہار، بروری اور شاہد، ساکن E-1789، جے جے کالونی، بوانہ کے طور پر کی گئی ہے۔

پولیس نے دونوں لاشوں کو پوسٹ مارٹم کے لیے بی جے آر ایم اسپتال کے مردہ خانہ میں محفوظ کر دیا ہے۔ ابتدائی تحقیقات کے مطابق حادثہ موٹر سائیکل کے بے قابو ہونے یا کسی نامعلوم گاڑی سے ٹکرانے کی وجہ سے پیش آیا۔ تاہم عینی شاہدین کی کمی کے باعث حادثے کی اصل وجہ واضح نہیں ہو سکی ہے۔

بھلسوا ڈیری پولیس اسٹیشن نے تعزیرات ہند کی دفعہ 281 اور 106 (1) کے تحت مقدمہ درج کیا ہے۔ مزید تفتیش آوٹر نارتھ ڈسٹرکٹ کے ایم اے سی ٹی سیل کو سونپ دی گئی ہے۔ پولیس آس پاس کے علاقے کی سی سی ٹی وی فوٹیج کی جانچ کر رہی ہے تاکہ حادثے کی وجہ معلوم کی جا سکے۔

ہندوستھان سماچار

ہندوستان سماچار / عطاءاللہ