من کی بات پروگرام سے عوام کو نئی سمت اور ترغیب ملتی ہے: وزیر اعلیٰ ڈاکٹر یادو

وزیر اعظم کے ریڈیو پروگرام ’من کی بات‘ کے 133 ویں ایڈیشن کی نشریات، وزیر اعلیٰ نے عوامی نمائندوں اور عوام کے ساتھ سماعت کی

بھوپال، 26 اپریل (ہ س)۔

مدھیہ پردیش کے وزیر اعلیٰ ڈاکٹر موہن یادو نے کہا ہے کہ ’’من کی بات‘‘ ملک کے کروڑوں شہریوں کو جوڑنے والا ایک مضبوط مکالمہ (سمواد) کا پلیٹ فارم ہے۔ اس کے ذریعے وزیر اعظم نریندر مودی سماج کے مختلف طبقات کی ترغیب دینے والی کہانیوں، اختراعات اور مثبت کوششوں کو سامنے لاتے ہیں، جس سے عوام کو نئی سمت اور تحریک ملتی ہے۔ وزیر اعلیٰ ڈاکٹر یادو اتوار کو ’’من کی بات‘‘ پروگرام سننے کے بعد میڈیا سے گفتگو کر رہے تھے۔ انہوں نے کہا کہ وزیر اعظم مودی نے من کی بات کے ذریعے اس پروگرام کو تمام ہم وطنوں کے دلوں میں بٹھا دیا ہے۔ انہوں نے ملک کو اختراع کا نیا نظریہ دیا ہے۔ ایسے پروگرام سماج میں مثبت سوچ کو فروغ دیتے ہیں اور قوم کی تعمیر میں عوامی شرکت کو مضبوط بناتے ہیں۔

وزیر اعلیٰ ڈاکٹر یادو نے اتوار کو وزیر اعظم مودی کے مقبول ریڈیو پروگرام ’’من کی بات‘‘ کے 133ویں ایڈیشن کو بھوپال کے وی آئی پی روڈ پر واقع ایک نجی ریسٹورنٹ میں عوامی نمائندوں کے ساتھ سنا۔ اس موقع پر عام لوگ بھی موجود تھے۔ وزیر اعلیٰ ڈاکٹر یادو نے اس موقع پر موجود عوام بالخصوص نوجوانوں سے دوستانہ گفتگو کی۔ ان کے ساتھ ناشتہ کیا اور ناری شکتی وندن سمیت مختلف موضوعات پر کھل کر تبادلہ خیال کیا۔ وزیر اعلیٰ ڈاکٹر یادو نے ریاست میں بیٹی بچاو-بیٹی پڑھاو کے تحت بیٹیوں کی تعلیم کے پختہ انتظامات اور حوصلہ افزائی کی امداد، خواتین کی سیکورٹی، خواتین ریزرویشن، ان کے ذریعہ معاش، مساوی تنخواہ اور انہیں خود روزگار سے جوڑ کر خود کفیل بنانے کے لیے ریاستی حکومت کی کوششوں کے بارے میں معلومات شیئر کیں۔ انہوں نے کہا کہ ناری شکتی وندن پر مرکزی حکومت مستعدی سے کوششیں کر رہی ہے، لیکن اپوزیشن جماعتوں کے عدم تعاون کی وجہ سے یہ تجویز پارلیمنٹ میں پاس نہیں ہو سکی۔

وزیر اعلیٰ ڈاکٹر یادو نے ریسٹورنٹ میں کیپ پینٹنگ کر رہے چار چھوٹے بچوں سے بات چیت کر کے ان کی حوصلہ افزائی کی۔ وزیر اعلیٰ ڈاکٹر یادو نے بچوں کو اپنے ہاتھوں سے ناشتہ کرایا۔ انہوں نے بچوں سے پڑھائی کے حوالے سے بات چیت کی اور انہیں ہمیشہ اپنے بڑوں، والدین اور بڑے بہن بھائیوں کا احترام کرنے اور والدین کا نام لیتے وقت ہمیشہ ’شریمتی‘ اور ’شری‘ سے شروع کر کے احترام کے ساتھ مخاطب کرنے کی نصیحت دی۔ وزیر اعلیٰ ڈاکٹر یادو نے عوام، نوجوانوں اور بچوں کے ساتھ ایک سرپرست کی طرح غیر رسمی گفتگو کی اور سب کے ساتھ گروپ فوٹو کھنچوا کر ان کا حوصلہ بھی بڑھایا۔من کی بات سننے اور عوام سے مکالمہ کے پروگرام میں وزیر مملکت برائے صحتِ عامہ و طبی تعلیم نریندر شیواجی پٹیل، راہل کوٹھاری، رویندر یتی سمیت دیگر عوامی نمائندے اور شہری موجود تھے۔

پروگرام کے بعد میڈیا سے خطاب کرتے ہوئے وزیر اعلیٰ ڈاکٹر یادو نے کہا کہ ’’من کی بات‘‘ پورے ملک کو یکجہتی کا مثبت پیغام دینے کی وزیر اعظم مودی کی ایک حیرت انگیز کوشش ہے۔ وزیر اعلیٰ نے کہا کہ پانی کے تحفظ کے شعبے میں ہمارا مدھیہ پردیش پورے ملک میں پیش پیش ہے۔ ’جل گنگا سنوردھن ابھیان‘ کے تحت ہماری حکومت آبی ڈھانچوں کی نئی تعمیر اور توسیع کے ساتھ ساتھ پرانے کنووں، تالابوں، باولیوں اور دیگر روایتی آبی ذرائع مثلاً ہینڈ پمپ وغیرہ کو بھی نئی زندگی دینے کی کوشش کر رہی ہے۔ اس مہم میں عوامی شراکت داری کو بھی یقینی بنایا جا رہا ہے۔ یہ مہم 30 جون تک مسلسل جاری رہے گی۔

ہندوستھان سماچار

ہندوستان سماچار / انظر حسن