اندور، گوالیار، اجین سمیت کئی شہروں میں چھٹی، پارہ 44.6 ڈگری سیلسیس تک پہنچا، 3 دن میں بارش کے آثار

بھوپال، 26 اپریل (ہ س)۔

بھوپال سمیت پورے مدھیہ پردیش میں شدید گرمی اور لو نے نظامِ زندگی کو درہم برہم کر دیا ہے۔ حالات کی سنگینی کو دیکھتے ہوئے انتظامیہ نے بڑا فیصلہ لیتے ہوئے بھوپال میں نرسری سے 8 ویں تک کے تمام اسکول 30 اپریل تک بند کر دیے ہیں۔ تاہم کلاس 9 ویں سے 12 ویں تک کی کلاسیں صبح 7.30 بجے سے دوپہر 12 بجے تک چلائی جائیں گی۔

انتظامیہ کے حکم کے مطابق، بھوپال میں کلاس 9 ویں سے 12 ویں تک کی کلاسیں صبح 7.30 بجے سے دوپہر 12 بجے تک منعقد ہوں گی۔ اسی طرح اندور، گوالیار اور اجین میں بھی چھوٹے بچوں کی کلاسوں میں تعطیل کا اعلان کیا گیا ہے۔ ضلع اندور میں بھی آنگن واڑی مراکز اور 8 ویں تک کے اسکولوں میں 27 سے 30 اپریل تک چھٹی رہے گی۔ محکمہ موسمیات نے ریاست کے 22 اضلاع میں ہیٹ ویو (لو) کا الرٹ جاری کیا ہے۔ لوگوں کو دوپہر 12 سے شام 4 بجے تک گھر سے باہر نہ نکلنے کی صلاح دی گئی ہے۔ خاص طور پر بچوں، بزرگوں اور بیمار افراد کو احتیاط برتنے کو کہا گیا ہے۔

قابلِ ذکر ہے کہ ہفتہ کو ریاست کے کئی شہروں میں درجہ حرارت 44 ڈگری سیلسیس سے تجاوز کر گیا۔ کھجوراہو سب سے گرم رہا، جہاں پارہ 44.6 ڈگری سیلسیس درج کیا گیا۔ اس کے علاوہ رتلام، دتیا، دھار اور نوگاوں-شیوپور میں بھی درجہ حرارت 44 ڈگری کے آس پاس رہا۔ بڑے شہروں میں گوالیار اور اجین میں 43 ڈگری، بھوپال میں 42.4 ڈگری، اندور میں 42.2 ڈگری اور جبل پور میں 42.6 ڈگری درجہ حرارت درج کیا گیا۔

محکمہ موسمیات کے مطابق گوالیار، بھنڈ، دتیا، چھترپور، پنا، ستنا، منڈلا، بالا گھاٹ، چھندواڑہ، نرمدا پورم، مندسور، رتلام، جھابوا، دھار اور علی راج پور سمیت 22 اضلاع میں لو کا اثر تیز رہے گا۔ وہیں، 27 اپریل سے اگلے تین دنوں کے دوران ریاست کے کچھ حصوں میں گرج چمک کے ساتھ ہلکی بارش ہونے کا امکان بھی ظاہر کیا گیا ہے، جس سے درجہ حرارت میں جزوی راحت مل سکتی ہے۔ انتظامیہ نے لوگوں سے اپیل کی ہے کہ تیز دھوپ سے بچیں، مناسب مقدار میں پانی پیئیں، ہلکے کپڑے پہنیں اور ضروری ہونے پر ہی گھر سے باہر نکلیں۔ بچوں کو خاص طور پر دھوپ سے دور رکھنے کی صلاح دی گئی ہے۔

ہندوستھان سماچار

---------------

ہندوستان سماچار / انظر حسن