25 ٹن کچرا راکھ، 150 ٹن ردی کپڑوں نے بڑھائی آگ کی شدت، رات بھر دہشت میں رہے رہائشی

بھوپال، 26 اپریل (ہ س)۔

مدھیہ پردیش کے دارالحکومت بھوپال کے انا نگر میں واقع گاربیج ٹرانسفر اسٹیشن میں ہفتہ کی دیر رات لگی شدید آگ نے پورے علاقے میں افراتفری پیدا کر دی۔ آگ اتنی خوفناک تھی کہ اس پر قابو پانے میں تقریباً 10 گھنٹے لگ گئے۔ آگ سے تقریباً 25 ٹن کچرا جل کر خاک ہو گیا اور لاکھوں روپے کے نقصان کا اندازہ ہے۔

معلومات کے مطابق آگ ہفتہ کی رات تقریباً 12 بجے بھڑکی، جو اتوار کی صبح تک دہکتی رہی۔ کئی حصوں میں دوپہر تک بھی دھواں اٹھتا رہا۔ آگ بجھانے کے لیے شہر کے تمام 11 فائر اسٹیشنوں سے 50 سے زائد فائر بریگیڈ اور پانی کے ٹینکر موقع پر تعینات کیے گئے۔ گوند پورہ، فتح گڑھ، بیرا گڑھ، کولار اور گاندھی نگر سمیت مختلف علاقوں سے پہنچی ٹیموں نے پوری رات راحت اور بچاو کا کام جاری رکھا۔

نگر نگم کے فائر افسر سوربھ پٹیل کا کہنا ہے کہ اطلاع ملتے ہی موقع پر تمام فائر اسٹیشنوں سے فائر بریگیڈ کو روانہ کر دیا گیا تھا۔ آگ پر قابو پا لیا گیا ہے۔ راحت کی بات یہ رہی کہ اس واقعے میں کوئی جانی نقصان نہیں ہوا۔

ابتدائی جانچ میں یہ بات سامنے آئی ہے کہ پلانٹ کے بند پڑے ریسائیکلنگ یونٹ میں تقریباً 150 ٹن ردی کپڑوں کا اسٹاک جمع تھا۔ خدشہ ہے کہ آگ کی شروعات اسی یونٹ سے ہوئی اور کپڑوں کے ڈھیر کی وجہ سے آگ تیزی سے پھیلی۔ یہی وجہ رہی کہ آگ پر قابو پانے میں زیادہ وقت لگا۔ بتایا جا رہا ہے کہ یہ پلانٹ پبلک-پرائیویٹ پارٹنرشپ (پی پی پی) ماڈل پر چل رہا تھا۔ آگ میں میٹریل ریکوری فیسیلٹی سمیت پلانٹ کا بڑا حصہ جل کر خاک ہو گیا، جس سے تقریباً 25 لاکھ روپے کے نقصان کا اندازہ ہے۔

کچرا ٹرانسفر اسٹیشن مین روڈ سے محض 10 میٹر کی دوری پر واقع ہے۔ آگ کے شعلے اور گھنا دھواں دیکھ کر آس پاس کے رہائشی دہشت میں آگئے۔ سڑک کنارے رہنے والے لوگوں نے پوری رات جاگ کر گزاری۔ آگ لگنے کے بعد کچرا پلانٹ میں افراتفری مچ گئی۔ اطلاع ملنے کے بعد فائر بریگیڈ کی ٹیم کے ساتھ نگر نگم کے کچھ افسر بھی موقع پر پہنچے۔ حالات کی سنگینی کو دیکھتے ہوئے احتیاطاً پولیس فورس بھی تعینات کی گئی۔

فی الحال آگ لگنے کی وجوہات کا واضح انکشاف نہیں ہو سکا ہے۔ شارٹ سرکٹ سمیت دیگر امکانات کو مدنظر رکھتے ہوئے جانچ کی جا رہی ہے۔ آگ پوری طرح بجھنے کے بعد نگر نگم اور محکمہ بجلی کے افسران مشترکہ معائنہ کریں گے۔

ہندوستھان سماچار

---------------

ہندوستان سماچار / انظر حسن