آسنسول، 20 اپریل (ہ س)۔ آسنسول کے ریل پار علاقے میں اتوار کی شام ایک خوفناک سڑک حادثے نے پورے علاقے کو ہلا کر رکھ دیا۔ بے قابو بس کی زد میں آکر سات سالہ بچی سمیت متعدد افراد زخمی ہوگئے۔ زخمیوں میں سے سات کی حالت تشویشناک بتائی جاتی ہے۔

اطلاعات کے مطابق، ترنمول کانگریس کے امیدوار ملے گھٹک کی حمایت میں منعقدہ ایک انتخابی ریلی ختم ہوتے ہی اچانک ایک بس بے قابو ہو کر جلسہ گاہ کی جانب تیزی سے گھس گئی ۔ بس پر ”مغربی بنگال پولیس“ لکھا ہوا تھا۔ الزام لگایا جا رہا ہے کہ بس کو سینٹرل انڈسٹریل سیکورٹی فورس (سی آئی ایس ایف) کا ایک افسر چلا رہا تھا جو مبینہ طور پر نشے میں تھا۔

عینی شاہدین کے مطابق بس اچانک کنٹرول کھو بیٹھی اور قبرستان کی دیوار سے ٹکرا گئی۔ اس کے بعد اس نے راستے میں کئی دکانوں، آٹو رکشا اور ٹوٹو کاروں کو ٹکر مار دی، جس میں ایک سات سالہ بچی سمیت کئی لوگ زخمی ہوگئے۔ سات افراد کے شدید زخمی ہونے کی اطلاع ہے جن میں سے بعض کی حالت تشویشناک ہے۔

واقعے کے بعد پورے علاقے میں افراتفری اور خوف و ہراس پھیل گیا۔ مشتعل مقامی لوگوں نے موقع پر بس کی توڑ پھوڑ کی اور سڑکوں پر آکر احتجاج کیا۔ حالات یہاں تک بڑھ گئے کہ حالات پر قابو پانے کے لیے بڑی تعداد میں پولیس اور مرکزی فورسز کو تعینات کرنا پڑا۔

ترنمول کانگریس کے امیدوار ملے گھٹک جائے حادثہ پر پہنچے اور بھیڑ کو پرسکون کرنے کی کوشش کی۔ انہوں نے زخمیوں کو مناسب علاج کی یقین دہانی کرائی اور غیر جانبدارانہ تحقیقات کا وعدہ کیا۔

فی الحال اس پورے واقعہ پر کئی سوالات اٹھ رہے ہیں۔ یہ واضح نہیں کہ یہ محض غفلت کا نتیجہ ہے یا کسی سازش کا۔ پولیس نے معاملے کی تحقیقات شروع کر دی ہے اور بس ڈرائیور سمیت تمام پہلوو¿ں پر غور کر رہی ہے۔ علاقے میں حالات قابو میں ہیں لیکن کشیدہ ہیں۔

ہندوستھان سماچار

ہندوستان سماچار / محمد شہزاد